தமிழகத்தில் பிஹார் தொழிலாளர்கள் ஒதுக்கப்படுகிறார்கள்? – முதல்வர் ஸ்டாலின் கடும் கண்டனம்; அரசியல் தலைவர்கள் எதிர்ப்பு
தமிழகத்தில் பிஹார் மாநிலத் தொழிலாளர்கள் மீது துன்புறுத்தல் நடக்கிறது என பிரதமர் நரேந்திர மோடி கூறியதற்கு, முதல்வர் மு.க.ஸ்டாலின் மற்றும் பல அரசியல் தலைவர்கள் கடும் எதிர்ப்பு தெரிவித்துள்ளனர். பிரதமர், நாட்டின் நலனில் கவனம் செலுத்த வேண்டும்; தாழ்ந்த அரசியலை நிறுத்த வேண்டும் என அவர்கள் வலியுறுத்தினர்.
பிஹார் சட்டப்பேரவைத் தேர்தலை முன்னிட்டு, சமீபத்தில் முசாபர்பூர் நகரில் நடைபெற்ற பாஜக கூட்டத்தில், காங்கிரஸ் மற்றும் திமுக உள்ளிட்ட இண்டியா கூட்டணி கட்சிகளை பிரதமர் மோடி கடுமையாக விமர்சித்தார். அதில், ‘‘கர்நாடகா, தெலங்கானா ஆகிய மாநிலங்களில் காங்கிரஸ் ஆட்சி; அங்கு பிஹார் மக்கள் அவமதிக்கப்படுகின்றனர். அதேபோல், தமிழகத்திலும் திமுக தலைவர்கள் பிஹார் தொழிலாளர்களை இகழ்ந்து பேசுகின்றனர்’’ என பேசியிருந்தார்.
இதற்கு பதிலளித்த முதல்வர் ஸ்டாலின், சமூக வலைதளத்தில்,
‘‘இந்த நாடு முழுவதும் உள்ள மக்களுக்கு பிரதமர் என்ற பொறுப்பு உங்களுக்கிருக்கிறது என்பதை மறந்துவிடாதீர்கள். தமிழர்களுக்கும் பிஹார் மக்களுக்கும் இடையே பிரிவு உருவாக்கும் பேச்சுகளை நிறுத்துங்கள். இந்தியாவின் ஒற்றுமையை காக்க வேண்டும்; அற்ப அரசியலை விட்டுவிட்டு தேசிய நலனில் கவனம் செலுத்த வேண்டும்’’ என பதிவிட்டார்.
இதேபோல் பல தலைவர்களும் கண்டனம் தெரிவித்துள்ளார்:
கனிமொழி MP:
வடமாநிலத் தேர்தல் வந்தாலே, தமிழர்களை எதிரியாக காட்டுவது BJP பழக்கம். பிஹார் தொழிலாளர்கள் தமிழகத்தில் பாதுகாப்பாக வாழ்கிறார்கள். ஒரே ஒருவர் மட்டும் துன்பப்படுகிறார்; அவர் ராஜ்பவனில் இருப்பவர்.
தமிழக காங்கிரஸ் தலைவர் செல்வப்பெருந்தகை:
என் தொகுதியில் மட்டும் 1 லட்சத்துக்கும் மேற்பட்ட பிஹார் தொழிலாளர்கள் சந்தோஷமாக வாழ்கிறார்கள். பிரதமர் தவறான தகவல் கூறியுள்ளார். அதை திரும்பப் பெற வேண்டும்.
மார்க்சிஸ்ட் கட்சி மாநில செயலாளர் பெ. சண்முகம்:
பிரதமர் மோடி, தனது ஆட்சியின் சாதனைகளை சொல்ல முடியாத காரணத்தால், பகை உணர்வை தூண்டும் அரசியலை நடத்துகிறார்.
நாம் தமிழர் கட்சி தலைவர் சீமான்:
பிஹார் தொழிலாளர்கள் தமிழகம் வந்தால் அவர்கள் பாதுகாப்பாக வாழ்கிறார்கள். பிரதமர் பரப்பும் இந்த குற்றச்சாட்டு பொய்யானது; தமிழர்களை அவமதிப்பது போன்றது.
