தமிழ் திரையுலகின் “இயக்குநர் இமயம்” பாரதிராஜா காலமானார்: தலைவர்கள், திரைப்பிரபலங்கள் அதிரும் இரங்கல்!
தமிழ் திரையுலகில் “இயக்குநர் இமயம்” என்று ஒட்டுமொத்தத் திரையுலகினராலும், ரசிகர்களாலும் போற்றப்படும் புகழ்பெற்ற இயக்குநர் பாரதிராஜா, வயது முதிர்வு மற்றும் உடல்நலக்குறைவு காரணமாக சென்னையில் இன்று அதிகாலை காலமானார். தமிழ் சினிமாவின் போக்கையே கிராமத்து மண்ணின் வாசனைக்கு மாற்றிய பெருமைக்குரிய இவர், ’16 வயதினிலே’ என்ற காவியப் படத்தின் மூலம் இயக்குநராக அறிமுகமானார். தனது முதல் படத்திலேயே கமல்ஹாசன், ரஜினிகாந்த், ஸ்ரீதேவி போன்ற முன்னணி நட்சத்திரங்களை வைத்து, தமிழ் சினிமா வரலாற்றில் நீங்கா இடம்பிடித்த ஒரு பிரம்மாண்ட வெற்றியைப் பதிவு செய்தவர்.
கடந்த ஆண்டு, இவரது மகனும் நடிகருமான மனோஜ் பாரதிராஜா திடீரென காலமானார். இந்த பேரிழப்பு பாரதிராஜாவை மன ரீதியாகவும் உடல் ரீதியாகவும் பெரும் பாதிப்புக்குள்ளாக்கியது. இதன் காரணமாக அவருக்கு அடிக்கடி உடல்நலக்குறைவு ஏற்பட்டு, மருத்துவமனையில் அனுமதிக்கப்பட்டு சிகிச்சை பெற்று வந்தார். பின்னர், சென்னை நீலாங்கரையில் உள்ள அவரது இல்லத்தில் மருத்துவர்களின் அறிவுரைப்படி ஓய்வெடுத்து வந்தார். இந்நிலையில், இன்று அதிகாலை சிகிச்சை பலனின்றி அவரது உயிர் பிரிந்தது.
இயக்குநர் இமயத்தின் இந்த மறைவுச் செய்தி தமிழ் திரையுலகை ஆழமான சோகத்தில் ஆழ்த்தியுள்ளது. கிராமியக் கலைகளையும், யதார்த்தமான மனிதர்களையும் திரையில் வாழவைத்த ஒரு சகாப்தத்தின் முடிவு இது எனப் பலரும் கண்ணீர் அஞ்சலி செலுத்தி வருகின்றனர். அவரது மறைவுக்குப் பல்வேறு அரசியல் கட்சித் தலைவர்கள், திரை உலகப் பிரபலங்கள், இயக்குநர்கள், நடிகர்கள் மற்றும் லட்சக்கணக்கான சினிமா ரசிகர்கள் தங்களது ஆழ்ந்த இரங்கல்களைத் தெரிவித்து வருகின்றனர்.
