என் இனிய தமிழ் மக்களே…. ‘இயக்குநர் இமயம்’ பாரதிராஜா கடந்து வந்த பாதை!
“என் இனிய தமிழ் மக்களே…” என்ற அந்த ஒற்றைக் காந்தக் குரலின் வழியே ஒட்டுமொத்தத் தமிழ் நெஞ்சங்களையும் கட்டிப்போட்டவர். தமிழ் சினிமாவை ஸ்டூடியோக்களின் நான்கு சுவர்களுக்குள் இருந்து உடைத்தெறிந்து, நிஜமான கிராமத்து மண்வாசனைக்கும், யதார்த்த மனிதர்களுக்கும் நேராகக் கூட்டிச் சென்ற ‘இயக்குநர் இமயம்’ பாரதிராஜாவின் அசாத்தியமான திரையுலகப் பயணம் இதோ:
திரையுலகப் பிரவேசமும் முதல் காவியமும்
தேனி மாவட்டம் அல்லிநகரம் ஊராட்சியில், பெரியமாத்தேவர் – மீனாட்சியம்மாள் தம்பதிக்கு 1941-ஆம் ஆண்டு ஜூலை 17-இல் மகனாகப் பிறந்தார் பாரதிராஜா. பள்ளிப் பருவத்திலேயே கலை மீது கொண்ட ஈர்ப்பால் நாடகங்களுக்குக் கதை எழுதத் தொடங்கினார். நடிக்கும் ஆர்வத்தோடு சென்னைக்கு வந்தவர், தொடக்கத்தில் உதவி இயக்குநராகத் தனது திரையுலகப் பயணத்தைத் துவங்கினார்.
பின்னர், 1977-ஆம் ஆண்டு இவர் இயக்கத்தில் வெளியான ’16 வயதினிலே’ திரைப்படம் தமிழ் சினிமாவின் போக்கையே மாற்றி அமைத்தது. சப்பmissing, பரட்டை, மயில் எனத் தமிழ் ரசிகர்கள் அதுவரை பார்த்திராத புதுமையான கதாபாத்திரப் படைப்புகளோடு வெளியான இப்படம் பிரம்மாண்ட வெற்றியைப் பெற்றது. தனது முதல் படத்திலேயே சிறந்த இயக்குநருக்கான தமிழக அரசின் விருதையும் பெற்று சாதனை படைத்தார் பாரதிராஜா.
காவியத் திரைப்படங்களும் நட்சத்திரங்களின் முகவரியும்
இயக்குநராக முத்திரை பதித்த பாரதிராஜா, ‘கல்லுக்குள் ஈரம்’ திரைப்படத்தின் மூலம் நடிகராகவும் அவதாரமெடுத்தார். அதனைத் தொடர்ந்து கிழக்கே போகும் ரயில், சிகப்பு ரோஜாக்கள், அலைகள் ஓய்வதில்லை, முதல் மரியாதை, மண்வாசனை, கருத்தம்மா உள்ளிட்ட பல எக்காலத்திற்கும் அழியாத காவியத் திரைப்படங்களைத் தமிழ் சினிமாவுக்குக் கொடையாகத் தந்தார்.
தமிழ் திரையுலகிற்குப் பல புதிய முகங்களை அறிமுகம் செய்த பெருமை இவருக்கு உண்டு. ராதிகா, ராதா, ரேவதி, ரஞ்சிதா போன்ற முன்னணி கதாநாயகிகளையும்; கார்த்திக், நெப்போலியன் உள்ளிட்ட பல முன்னணி கதாநாயகர்களையும் திரையுலகிற்குத் தந்த பெருமைமிகு ‘வார்த்தெடுத்த சிற்பி’ இவரே ஆவார்.
தேடிவந்த உயரிய விருதுகள்
இந்தியத் திரையுலகிற்கு இவர் ஆற்றிய ஒப்பற்ற பங்களிப்பைப் பாராட்டும் விதமாக, கடந்த 2004-ஆம் ஆண்டு மத்திய அரசு இவருக்கு நாட்டின் உயரிய விருதுகளுள் ஒன்றான ‘பத்மஸ்ரீ’ விருதை வழங்கி கௌரவித்தது. இதுதவிர, பல தேசியத் திரைப்பட விருதுகள், பிலிம்பேர் விருதுகள், தமிழ்நாடு மாநிலத் திரைப்பட விருதுகள் மற்றும் ஆந்திர அரசின் நந்தி விருதுகள் எனப் பல டஜன் விருதுகளைத் தனது திரை ஆளுமையால் வென்று குவித்தவர் பாரதிராஜா.
தனிப்பட்ட வாழ்க்கையும் துயர முடிவும்
தனது சகோதரியின் மகளான சந்திர லீலா என்பவரைத் திருமணம் செய்துகொண்ட பாரதிராஜாவுக்கு, மனோஜ் என்ற மகனும், ஜனனி என்ற மகளும் உள்ளனர். தந்தையின் ‘தாஜ்மகால்’ படத்தின் மூலம் தமிழ் சினிமாவில் கதாநாயகனாக அறிமுகமாகி 15-க்கும் மேற்பட்ட படங்களில் நடித்தவர் மனோஜ் பாரதிராஜா. கடந்த ஆண்டு மார்ச் 25-ஆம் தேதி, மகன் மனோஜ் பாரதிராஜா திடீரென மாரடைப்பால் காலமானார்.
மகனின் இந்த அகால மரணம் பாரதிராஜாவை மீளாத் துயரிலும், கடுமையான மன வேதனையிலும் ஆழ்த்தியது. மகன் இழந்த சோகம் ஒருபுறம், வயது மூப்பு மற்றும் உடல்நலக்குறைவு மறுபுறம் எனப் போராடி வந்த ‘இயக்குநர் இமயம்’ பாரதிராஜா, இன்று அதிகாலை சிகிச்சை பலனின்றி இயற்கை எய்தினார். தமிழ் சினிமாவின் மாபெரும் சகாப்தம் மறைந்தாலும், அவர் விட்டுச் சென்ற படைப்புகள் ‘என் இனிய தமிழ் மக்களின்’ நெஞ்சங்களில் என்றும் நிலைத்திருக்கும்.
