தவெக அமைச்சரவையில் ஐ.யு.எம்.எல்-க்கு இடம்? இன்று கூடுகிறது உயர்மட்டக் குழு!
சென்னை: தமிழகத்தில் தவெக தலைமையிலான புதிய அமைச்சரவையில் இந்திய யூனியன் முஸ்லிம் லீக் (I.U.M.L.) கட்சிக்கு ஒரு அமைச்சர் பதவி ஒதுக்கப்பட்டுள்ளதாகத் தகவல்கள் வெளியாகியுள்ளன. முன்னதாக, தமிழக அமைச்சரவையில் ஐ.யு.எம்.எல். மற்றும் விசிக ஆகிய கட்சிகள் இடம்பெற வேண்டும் என்று அமைச்சர் ஆதவ் அர்ஜூனா அதிகாரப்பூர்வமாக அழைப்பு விடுத்திருந்தார்.
இந்தச் சூழலில், தவெக-வின் இந்த அழைப்பு குறித்து விவாதிக்க ஐ.யு.எம்.எல். கட்சி இன்று காலை அவசர உயர்மட்டக் குழுவைக் கூட்டி முக்கிய ஆலோசனை மேற்கொள்ளவுள்ளது. இக்கூட்டத்தில், புதிய அமைச்சரவையில் எந்தத் துறையைக் கேட்டுப் பெறுவது மற்றும் கட்சியின் 2 எம்.எல்.ஏ-க்களில் யாரை அமைச்சராக நியமிப்பது என்பது குறித்து தீவிரமாக ஆலோசிக்கப்பட உள்ளது. இக்கூட்டத்தின் முடிவில் எடுக்கப்படும் இறுதி முடிவு, இன்று காலையிலேயே அதிகாரப்பூர்வமாக அறிவிக்கப்படும் என எதிர்பார்க்கப்படுகிறது.
