கரூர் துயரச் சம்பவம்: தவெக நிர்வாகிகள் மீது வழக்குப் பதிவு செய்த ஆய்வாளர் மணிவண்ணன் உட்பட 19 போலீசார் கூண்டோடு இடமாற்றம்!
கரூர்:
கரூரில் கடந்த ஆண்டு நடைபெற்ற தேர்தல் பிரசாரக் கூட்ட நெரிசல் விவகாரத்தில், தவெக நிர்வாகிகள் மீது வழக்குப் பதிவு செய்த காவல் ஆய்வாளர் மணிவண்ணன் உட்பட 19 காவல்துறையினரை அதிரடியாகப் பணியிட மாற்றம் செய்து காவல்துறை தலைமை இயக்குநரகம் (DGP Office) உத்தரவிட்டுள்ளது.
கடந்த ஆண்டு செப்டம்பர் 27-ஆம் தேதியன்று கரூரில் தவெக தலைவரும், தற்போதைய முதலமைச்சருமான விஜய் பங்கேற்ற தேர்தல் பிரசாரக் கூட்டத்தின் போது ஏற்பட்ட பயங்கர கூட்ட நெரிசலில் சிக்கி 41 பேர் பரிதாபமாகப் பலியாகினர். நாடு முழுவதும் பெரும் அதிர்வலைகளை ஏற்படுத்திய இச்சம்பவம் குறித்துத் தற்போது சிபிஐ (CBI) அதிகாரிகள் தீவிர விசாரணை நடத்தி வருகின்றனர். இந்த விசாரணையின் ஒரு பகுதியாக முதலமைச்சர் விஜய் மற்றும் தவெக முக்கிய நிர்வாகிகளை டெல்லிக்கு வரவழைத்தும் சிபிஐ அதிகாரிகள் அண்மையில் விசாரணை நடத்தியிருந்தனர்.
இதனிடையே, நடந்து முடிந்த தமிழக சட்டமன்றத் தேர்தலில் தவெக அமோக வெற்றி பெற்று, கடந்த 10-ஆம் தேதி ஜோசப் விஜய் முதலமைச்சராகப் பொறுப்பேற்றுக் கொண்டார். அவருடன் 9 அமைச்சர்களும் பதவியேற்று அரசுப் பணிகளைத் தொடங்கியுள்ளனர்.
19 போலீசார் கூண்டோடு இடமாற்றம்:
புதிய அரசு பொறுப்பேற்றுள்ள நிலையில், கரூர் கூட்ட நெரிசல் துயரச் சம்பவத்தின் போது கரூரில் பணியில் இருந்த காவல்துறையினர் 19 பேர் தற்போது அதிரடியாகக் கூண்டோடு இடமாற்றம் செய்யப்பட்டுள்ளனர்.
இதில் கரூர் மாவட்டக் காவல் துணை கண்காணிப்பாளர் (DSP) செல்வராஜ், தவெக நிர்வாகிகள் மீது முதற்கட்டமாக வழக்குப் பதிவு செய்த காவல் ஆய்வாளர் (Inspector) மணிவண்ணன் மற்றும் தனிப்பிரிவு காவலர்களான (Intelligence Officers) ராஜாமணி, ராமலிங்கம், மோகன்ராஜ், கதிர்வேல் உள்ளிட்ட 19 போலீசார் அடியோடு மாற்றப்பட்டுள்ளனர்.
இடமாற்றம் செய்யப்பட்டுள்ள அதிகாரிகள் அனைவரும் உடனடியாகக் கரூர் மாவட்டத்தில் இருந்து விடுவிக்கப்பட்டு, தெற்கு மற்றும் வடக்கு மண்டலங்களுக்கு உட்பட்ட வெவ்வேறு பகுதிகளுக்குப் பணியிட மாற்றம் செய்யப்பட்டுள்ளனர். தமிழகத்தில் ஆட்சி மாற்றம் ஏற்பட்டு முதலமைச்சர் விஜய் பதவியேற்ற சில நாட்களிலேயே, கரூர் சம்பவத்தில் தொடர்புடைய காவல் அதிகாரிகள் மாற்றப்பட்டிருப்பது அரசியல் மற்றும் காவல்துறை வட்டாரத்தில் பெரும் பரபரப்பை ஏற்படுத்தியுள்ளது.
