“புதிய நம்பிக்கையுடன் முன்னேறும் இந்தியா” – ஸ்வீடனில் பிரதமர் மோடி பெருமிதம்: நாட்டின் உயரிய விருதும் வழங்கப்பட்டது!
கோதென்பர்க் (ஸ்வீடன்):
“உலக அரங்கில் இந்தியா இன்று ஒரு புதிய நம்பிக்கையுடனும் அசாத்திய வேகத்துடனும் முன்னேறி வருகிறது” என்று பிரதமர் நரேந்திர மோடி பெருமிதத்துடன் தெரிவித்துள்ளார். அரசுமுறைப் பயணமாக ஸ்வீடன் சென்றுள்ள பிரதமர் மோடிக்கு, அந்நாட்டின் உயரிய ‘ராயல் ஆர்டர் ஆஃப் போலார் ஸ்டார்’ விருது வழங்கி கௌரவிக்கப்பட்டுள்ளது.
ஸ்வீடன் நாட்டின் கோதென்பர்க் (Gothenburg) நகரைச் சென்றடைந்த பிரதமர் மோடிக்கு அந்நாட்டு அரசு சார்பில் சிறப்பான வரவேற்பு அளிக்கப்பட்டது. இதனைத் தொடர்ந்து, ஸ்வீடன் பிரதமர் உல்ஃப் கிரிஸ்டர்சன் (Ulf Kristersson) மற்றும் ஐரோப்பிய ஆணையத் தலைவர் உர்சுலா வான் டெர் லேயன் (Ursula von der Leyen) ஆகியோரை பிரதமர் மோடி நேரில் சந்தித்து இருதரப்பு உறவுகள் குறித்து உயர்மட்டப் பேச்சுவார்த்தை நடத்தினார். இந்த ஆலோசனையின் போது செயற்கை நுண்ணறிவு (AI), பசுமைப் போக்குவரத்து மற்றும் நவீன உற்பத்தித் துறை உள்ளிட்ட முக்கியத் துறைகளில் இணைந்து செயல்படுவது குறித்து விவாதிக்கப்பட்டது.
ஐரோப்பிய வட்டமேசை மாநாட்டில் பிரதமர் உரை:
கோதென்பர்க் நகரில் நடைபெற்ற தொழில்துறைக்கான புகழ்பெற்ற ‘ஐரோப்பிய வட்டமேசை மாநாட்டில்’ (European Round Table for Industry) பிரதமர் மோடி சிறப்பு விருந்தினராகப் பங்கேற்று உரையாற்றினார். அப்போது அவர் பேசியதாவது:
“இன்று இந்தியாவுக்கும் ஐரோப்பாவிற்கும் இடையிலான ராஜதந்திர மற்றும் பொருளாதார உறவுகள் ஒரு புதிய திருப்புமுனையை எட்டியுள்ளன. உலகளவில் வேகமாக வளர்ந்து வரும் முன்னணிப் பொருளாதாரமாக இந்தியா புதிய நம்பிக்கையுடன் உத்வேகம் பெற்றுள்ளது. இந்தியாவின் இளம் மக்கள் தொகை (Demographic Dividend), வேகமாக விரிவடைந்து வரும் நடுத்தர வர்க்கம் மற்றும் அசுர வேகத்தில் மேம்பட்டு வரும் உள்கட்டமைப்பு வசதிகள் ஆகியவை இந்த வளர்ச்சிக்கு வலுவான அடித்தளமாக அமைந்துள்ளன.”
மேலும், “இந்தியா இன்று உலகின் 3-வது பெரிய ஸ்டார்ட்அப் (Startup Ecosystem) அமைப்பைக் கொண்டுள்ளது. நமது இளைஞர்களின் ஸ்டார்ட்அப்கள் வெறும் உள்நாட்டுத் தேவைகளுக்கு மட்டுமின்றி செயற்கை நுண்ணறிவு, ஃபின்தெக் (Fintech), விண்வெளித் துறை, ட்ரோன்கள், உயிரி தொழில்நுட்பம், குற்றவியல் தொழில்நுட்பம் மற்றும் போக்குவரத்துத் துறைகளில் உலகளாவிய தீர்வுகளை (Global Solutions) உருவாக்கி வருகின்றன” என்றும் பிரதமர் பெருமிதத்துடன் குறிப்பிட்டார்.
ஸ்வீடிஷ் ஓபரா பாடகியின் ‘வைஷ்ணவ ஜன தோ’ பாடல்:
இந்நிகழ்ச்சியின் போது, ஸ்வீடன் நாட்டின் பிரபல ஓபரா பாடகி சார்லோட்டா ஹுல்ட் (Charlotta Huldt), மகாத்மா காந்திக்கு மிகவும் பிடித்தமான புகழ்பெற்ற பக்திப் பாடலான “வைஷ்ணவ ஜன தோ” பாடலை மிகத் துல்லியமாகப் பாடி அரங்கில் இருந்த அனைவரையும் வியப்பில் ஆழ்த்தினார்.
இந்த நெகிழ்ச்சியான வீடியோவை பிரதமர் மோடி தனது அதிகாரப்பூர்வ ‘எக்ஸ்’ (X) பக்கத்தில் பகிர்ந்து, “மகாத்மா காந்தியின் நிலையான சிந்தனைகள் உலகம் முழுவதும் மனிதகுலத்திற்குத் தொடர்ந்து ஊக்கமளித்து வருகின்றன; அவரது உன்னதக் கருத்துகள் அனைவரையும் ஒரு சிறந்த உலகை உருவாக்கத் தூண்டட்டும்” என்று பதிவிட்டுள்ளார். இப்பாடல் தற்போது இணையத்தில் உலகளவில் வைரலாகி வருகிறது.
பிரதமர் மோடிக்கு 31-வது சர்வதேச விருது:
இந்தப் பயணத்தின் மிக முக்கிய மைல்கல்லாக, ஸ்வீடன் நாட்டின் உயரிய சிவிலியன் கௌரவமான ‘ராயல் ஆர்டர் ஆஃப் போலார் ஸ்டார் கமாண்டர் கிராண்ட் கிராஸ்’ (Commander Grand Cross of the Royal Order of the Polar Star) என்ற மிக உயரிய சிறப்புமிக்க விருது பிரதமர் நரேந்திர மோடிக்கு வழங்கப்பட்டது.
ஒரு நாட்டின் மிகச்சிறந்த உலகளாவிய தலைமைத்துவத்திற்கு வழங்கப்படும் இந்த உயரிய அங்கீகாரத்தின் மூலம், உலக நாடுகளால் பிரதமர் மோடிக்கு இதுவரை வழங்கப்பட்ட சர்வதேச விருதுகளின் மொத்த எண்ணிக்கை 31-ஆக உயர்ந்துள்ளது என்பது குறிப்பிடத்தக்கது.
