பள்ளி, கல்லூரிகளில் போதைப்பொருள் நடமாட்டம் உள்ளதா? – தீவிர ஆய்வு நடத்த டாஸ்மாக் நிர்வாகம் அதிரடி உத்தரவு!
சென்னை:
தமிழகத்தில் புதிய அரசு பொறுப்பேற்றதைத் தொடர்ந்து, பள்ளி மற்றும் வழிபாட்டுத் தலங்களுக்கு அருகே செயல்பட்டு வந்த டாஸ்மாக் கடைகள் அதிரடியாக மூடப்பட்டன. இந்தச் சூழலில், மாணவர்களின் நலனைக் கருத்தில் கொண்டு, மாநிலம் முழுவதும் உள்ள கல்வி நிறுவனங்களின் அருகே போதைப்பொருள் நடமாட்டத்தைக் கண்காணிக்கத் டாஸ்மாக் நிர்வாகம் தனது துறை சார்ந்த அதிகாரிகளுக்குப் புதிய உத்தரவைப் பிறப்பித்துள்ளது.
தீவிர கண்காணிப்பு மற்றும் கள ஆய்வு:
டாஸ்மாக் நிர்வாகம் வெளியிட்டுள்ள சுற்றறிக்கையின்படி, தமிழகத்தில் உள்ள அனைத்து பள்ளிகள் மற்றும் கல்லூரிகள் போன்ற கல்வி நிலையங்களின் வளாகங்களிலோ அல்லது அதன் அருகாமையிலோ போதைப்பொருள் நடமாட்டம் ஏதேனும் உள்ளதா என்பதை அதிகாரிகள் தீவிரமாகக் கண்காணித்து ஆய்வு செய்ய வேண்டும் என உத்தரவிடப்பட்டுள்ளது.
மேலும், அண்மையில் அதிரடியாக மூடப்பட்ட டாஸ்மாக் கடைகளின் அருகே, சட்டவிரோதமாக ஏதேனும் மது விற்பனை (பார் நடத்துதல் அல்லது கள்ளச்சந்தையில் விற்றல்) நடைபெறுகிறதா? என்பதையும் கள ஆய்வு செய்ய அறிவுறுத்தப்பட்டுள்ளது. இதுமட்டுமின்றி, கள்ளச்சாராயம் தயாரித்தல் மற்றும் இதர போதைப்பொருள் கடத்தல் போன்ற சட்டவிரோதச் செயல்களை முன்கூட்டியே கண்டறிந்து கட்டுப்படுத்தவும் கடுமையான உத்தரவுகள் பிறப்பிக்கப்பட்டுள்ளன.
விழிப்புணர்வு மற்றும் மீட்புத் திட்டங்கள்:
மாணவச் செல்வங்கள் போதைப்பாதையில் சிக்காமல் தடுக்கும் நோக்கில், பள்ளி மற்றும் கல்லூரிகளில் போதைப்பொருள் தடுப்பு குறித்த விழிப்புணர்வு முகாம்களையும், நிகழ்ச்சிகளையும் தொடர்ச்சியாக நடத்த டாஸ்மாக் நிர்வாகம் அறிவுறுத்தியுள்ளது.
குறிப்பாக, போதைப்பழக்கத்திற்கு அடிமையானவர்களை மீட்டெடுக்கும் “போதைப்பொருள் மீட்புத் திட்டங்களை” (De-addiction programs) மாநிலம் முழுவதும் தொய்வின்றிச் செயல்படுத்துவதற்காக, தமிழகச் சுகாதாரத்துறையுடன் டாஸ்மாக் அதிகாரிகள் இணைந்து கூட்டு நடவடிக்கைகளை மேற்கொள்ள வேண்டும் என்றும் இந்த உத்தரவில் மிக முக்கியமாக வலியுறுத்தப்பட்டுள்ளது. அரசின் இந்த அதிரடி நடவடிக்கை பொதுமக்களிடையேயும், பெற்றோர்களிடையேயும் பெரும் வரவேற்பைப் பெற்றுள்ளது.
