உத்தரப்பிரதேசத்தில் விறுவிறுப்பு: தண்ணீர் தொட்டி உச்சியில் சிக்கிய சிறுவர்கள் – ஹெலிகாப்டர் மூலம் மீட்ட விமானப்படை!
கோரக்பூர்:
உத்தரப்பிரதேசத்தில் பழுதடைந்த மேல்நிலை நீர்த்தேக்கத் தொட்டியின் உச்சியில் சிக்கித் தவித்த இரண்டு சிறுவர்களை, இந்திய விமானப்படை ஹெலிகாப்டர் உதவியுடன் அதிரடியாக மீட்டது.
இரவு முழுவதும் தவிப்பு:
உத்தரப்பிரதேச மாநிலம் கோரக்பூர், சித்தார்த் நகர் பகுதியில் உள்ள உயரமான மேல்நிலை நீர்த்தேக்கத் தொட்டியின் மீது இரண்டு சிறுவர்கள் விளையாட்டாக ஏறியுள்ளனர். அவர்கள் மேலே சென்ற பிறகு, தொட்டியின் இரும்பு ஏணி எதிர்பாராத விதமாகச் சேதமடைந்து கீழே விழுந்தது. இதனால் கீழே இறங்க வழியில்லாமல், அச்சிறுவர்கள் இரவு முழுவதும் தொட்டியின் உச்சியிலேயே தவிக்கும் சூழல் உருவானது.
விமானப்படை வரவழைப்பு:
தகவலறிந்து வந்த தீயணைப்புத் துறையினரால் ஏணி இல்லாத காரணத்தால் உடனடியாக மேலே செல்ல முடியவில்லை. சிறுவர்களின் உயிருக்கு ஆபத்து நிலவுவதை உணர்ந்த மாவட்ட நிர்வாகம், உடனடியாக இந்திய விமானப்படையின் உதவியை நாடியது.
அதிரடி மீட்புப் பணி:
அதிகாரிகளின் வேண்டுகோளை ஏற்று, இந்திய விமானப்படையின் ஹெலிகாப்டர் சம்பவ இடத்திற்கு விரைந்தது. வானில் நிலைநிறுத்தப்பட்ட ஹெலிகாப்டரில் இருந்து கயிறுகள் மூலம் வீரர்கள் கீழே இறங்கி, தவித்துக் கொண்டிருந்த இரண்டு சிறுவர்களையும் பத்திரமாக மீட்டனர்.
உயிருக்கு ஆபத்தான நிலையில் இருந்த சிறுவர்களைப் பத்திரமாக மீட்ட இந்திய விமானப்படை வீரர்களுக்கு, அங்கிருந்த பொதுமக்களும் சிறுவர்களின் பெற்றோர்களும் கண்ணீர் மல்க நன்றி தெரிவித்தனர்.
