கேரளாவில் காங்கிரஸ் கூட்டணி மீண்டும் ஆட்சியைப் பிடிக்கிறது: தேர்தலுக்குப் பிந்தைய கருத்துக்கணிப்புகளில் தகவல்!
கேரளாவில் உள்ள 140 சட்டமன்றத் தொகுதிகளுக்கும் தேர்தல் முடிவடைந்துள்ள நிலையில், அங்கு காங்கிரஸ் தலைமையிலான ஐக்கிய ஜனநாயக முன்னணி (UDF) ஆட்சியைப் பிடிக்கும் எனப் பல்வேறு தேர்தலுக்குப் பிந்தைய கருத்துக்கணிப்புகள் ஒருமித்த கருத்தைத் தெரிவித்துள்ளன. CNN-News 18 வெளியிட்டுள்ள கணிப்பில், காங்கிரஸ் கூட்டணி 70 முதல் 80 இடங்களைக் கைப்பற்றிப் பெரும்பான்மை பெறும் என்றும், ஆளும் இடதுசாரி முன்னணி (LDF) 58 முதல் 68 இடங்களை மட்டுமே பெறும் என்றும் கூறப்பட்டுள்ளது. அதேபோல், Peoples Pulse கணிப்பு காங்கிரஸ் கூட்டணிக்கு 75 முதல் 85 இடங்கள் வரை கிடைக்கும் என அதிகப்படியான வெற்றியை முன்கூட்டியே கணித்துள்ளது.
மற்றொருபுறம், P-Marq மற்றும் JVC ஆகிய நிறுவனங்களின் கணிப்புகளும் காங்கிரஸ் கூட்டணியே முன்னிலை பெறும் என்பதை உறுதிப்படுத்துகின்றன. JVC கணிப்பின்படி, காங்கிரஸ் கூட்டணி 72 முதல் 84 இடங்களைப் பெற்று ஆட்சியமைக்கும் என்றும், ஆளும் இடதுசாரி முன்னணி 52 முதல் 61 இடங்களுக்குத் தள்ளப்படும் என்றும் தெரிவிக்கப்பட்டுள்ளது. கேரளாவில் நீண்டகாலமாக நிலவி வரும் ‘மாற்று ஆட்சி’ (LDF மற்றும் UDF மாறி மாறி ஆட்சி அமைப்பது) என்ற அரசியல் வழக்கம் இம்முறையும் தொடரும் என்பதை இந்தக் கணிப்புகள் உணர்த்துகின்றன.
மேலும், இந்தத் தேர்தலில் பாஜக தலைமையிலான என்.டி.ஏ கூட்டணி 1 முதல் 7 இடங்கள் வரை பெற்று தனது இருப்பைப் பதிவு செய்யும் என்றும் அனைத்துக் கணிப்புகளும் தெரிவித்துள்ளன. தமிழகம் மற்றும் புதுச்சேரியுடன் சேர்த்து கேரளாவிற்கும் வரும் மே 4-ஆம் தேதி வாக்கு எண்ணிக்கை நடைபெறவுள்ள நிலையில், அம்மாநில மக்கள் யாருக்கு வாக்களித்துள்ளனர் என்பது அதிகாரப்பூர்வமாகத் தெரியவரும்.
