சிக்கிம் மாநிலத்தின் 50-வது உதய தின விழா: ரூ.4,018 கோடி மதிப்பிலான திட்டங்களைப் பிரதமர் மோடி தொடங்கி வைத்தார்!
சிக்கிம் மாநிலம் உருவாக்கப்பட்டு 50 ஆண்டுகள் நிறைவடைவதைக் கொண்டாடும் பொன் விழா கொண்டாட்டத்தில் பங்கேற்பதற்காகப் பிரதமர் நரேந்திர மோடி இரண்டு நாள் பயணமாக அம்மாநிலத்திற்குச் சென்றுள்ளார். மேற்கு வங்கத் தேர்தல் பிரசாரத்தை முடித்துக் கொண்டு காங்டாக் வந்தடைந்த பிரதமர், அங்குள்ள உலகத்தரம் வாய்ந்த ஆர்கிட் மலர்கள் மற்றும் சிலைகள் நிறைந்த ‘ஸ்வர்ணஜெயந்தி மைத்ரி மஞ்சரி’ பூங்காவைப் பார்வையிட்டார். இதனைத் தொடர்ந்து நடைபெற்ற பிரம்மாண்ட உதய தின விழாவில் கலந்து கொண்ட அவர், பல்வேறு மாநிலங்களின் பாரம்பரிய கலை நிகழ்ச்சிகளை ஆர்வத்துடன் கண்டுகளித்தார்.
இந்த விழாவின் ஒரு பகுதியாக, சிக்கிம் மாநிலத்தின் வளர்ச்சிக்காக ரூ.4,018 கோடி மதிப்பிலான பல்வேறு புதிய திட்டங்களுக்குப் பிரதமர் மோடி அடிக்கல் நாட்டி, முடிவுற்ற திட்டங்களைத் தொடங்கி வைத்தார். இந்த முக்கிய நிகழ்வில் சிக்கிம் மாநில ஆளுநர் ஓம் பிரகாஷ் மாத்தூர் மற்றும் முதலமைச்சர் பிரேம் சிங் தமாங் உள்ளிட்ட உயர் அதிகாரிகள் கலந்து கொண்டனர். மாநிலத்தின் உட்கட்டமைப்பு மற்றும் வளர்ச்சியை மேம்படுத்தும் நோக்கில் இந்தத் திட்டங்கள் அரங்கேற்றப்பட்டுள்ளன.
