கூகுள் ஏஐ மையம் நிறுவப்படுவது இந்தியாவிற்கு கிடைத்த பெரிய வரம்: பிரேமலதா வாழ்த்து
கூகுள் நிறுவனம் அதன் பிரம்மாண்டமான செயற்கை நுண்ணறிவு மையத்தை அமைப்பது இந்தியாவிற்கு கிடைத்த மிகப்பெரிய வரம் என்று தேமுதிக பொதுச் செயலாளர் பிரேமலதா விஜயகாந்த் தெரிவித்துள்ளார்.
அவர் வெளியிட்ட அறிக்கையில் கூறியதாவது: “ஆந்திரா பிரதேசத்தில் கூகுள் நிறுவனம் அதன் பிரம்மாண்டமான செயற்கை நுண்ணறிவு மையத்தை நிறுவுவது இந்தியாவிற்கு கிடைத்த மிகப்பெரிய வரமாகும். இது இந்தியாவின் முன்னேற்றத்திற்கு மற்றும் உலக அரங்கில் வல்லரசாக உருவாகுவதற்கான முக்கிய அடையாளமாக அமைகிறது. அமெரிக்காவைத் தவிர, வெளிநாட்டுகளில் கூகுள் நிறுவனத்தின் பெரிய முதலீடு முதன்முறையாக இந்தியாவில் மேற்கொள்ளப்படுவது, நமது நாட்டின் பொருளாதாரம் மற்றும் தொழில்நுட்ப வளர்ச்சிக்கு மிகப்பெரிய தூண்டுதலாக இருக்கும்.
இந்த 1.3 லட்சம் கோடி மதிப்புள்ள ஏஐ மையம் ஆந்திர மாநிலம் விசாகப்பட்டினத்தில் அமைக்கப்படுவது இந்தியாவிற்கு ஒரு முக்கிய வாய்ப்பு. இளைஞர்கள் பல லட்சம் பேருக்கு வேலை வாய்ப்புகள் நேரடியாகவும் மறைமுகமாகவும் இந்த மையம் வழங்கும் என்பது உறுதியானது. இதன் மூலம் பொருளாதாரம், வணிகம் மற்றும் தொழில்நுட்ப துறைகளில் இந்தியா மேலும் முன்னேறும்.
இளைஞர்களின் திறன்களை மேம்படுத்தவும், வேலை வாய்ப்புகளை உருவாக்கவும் இந்த மையம் முக்கிய பங்கு வகிக்கும். அதேபோல், தமிழ் நாட்டிலும் உலக தரத்திற்கேற்ப தொழில்நுட்ப நிறுவனங்கள் நிறுவப்பட வேண்டும் என்பது ஒவ்வொரு தமிழரின் ஆசை. தமிழகத்தில் இதுபோன்ற திட்டங்கள் அமையும் பட்சத்தில், அது இளைஞர்களின் எதிர்காலத்திற்கு மிகப்பெரிய வாய்ப்பாக இருக்கும்.
தேசிய முற்போக்கு திராவிடக் கழகத்தின் சார்பில், இந்த வாய்ப்பு ஒவ்வொரு தமிழருக்கும் கிடைக்க வேண்டும். ஆந்திரா மாநில முதல்வர் சந்திரபாபு நாயுடுவுக்கும், கூகுள் நிறுவனத்தின் தலைமை செயல் அதிகாரி தமிழகத்தாரான சுந்தர் பிச்சை மற்றும் அவரது குழுவினருக்கும் இந்த மாபெரும் திட்டத்திற்கு எங்கள் மனமார்ந்த வாழ்த்துகள்” என்று பிரேமலதா விஜயகாந்த் கூறியுள்ளார்.
