விஜய்யின் ‘சனிக்கிழமை’ சுற்றுப் பயண மர்மம்: தவெக தொண்டர்களின் நிலைமை என்ன?
ஒருவழியாக தமிழகம் முழுவதும் விஜயம் செய்யப்போகிறார் என்று அறிவித்துவிட்டார் விஜய். ஆனால் ‘சனிக்கிழமையில்தான் வண்டி ஓடும்’ என்று கூறப்படும் வகையில் வெளியான அந்த பயண அட்டவணை, தவெக-வில் பரபரப்பை ஏற்படுத்தியுள்ளது. ஏற்கனவே, ‘பனையூர் கட்சி’, ‘வர்க்க் ஃப்ரம் ஹோம் கட்சி’ என்ற கேலி வசனங்களைத் தாங்கியிருந்த தொண்டர்கள், இப்போது ‘வீக் எண்ட் கட்சி’ என்ற சொல்லாடலையும் எதிர்கொள்ள ஆரம்பித்துள்ளனர்.
‘ஒரு தடவை தீர்மானிச்சுட்டா, என் சொன்னதை நானே கேட்க மாட்டேன்’ என்பது விஜய்யின் ஹிட் டயலாக். அதுபோல், 2026-ல் முதலமைச்சர் பதவியே இலக்கு எனும் உறுதியோடு அரசியலுக்கு வந்தார் விஜய். கட்சியின் முதல் மாநில மாநாடு, பரந்தூர் விஜயம், இரண்டாவது மாநில மாநாடு என கடந்த இரண்டரை வருடங்களில் பனையூரை விட்டு வெளியே வந்த தருணங்களை விரல்களில் எண்ணிவிடலாம்.
அத்தகைய சூழ்நிலையில்தான், தமிழகம் முழுவதும் சுற்றுப்பயணத்தை அறிவித்திருக்கிறார் விஜய். அவரின் பயணத்தை ஆர்வத்துடன் எதிர்நோக்கிய தொண்டர்கள், திட்டத்தைப் பார்த்து சற்றே குழப்பமடைந்துள்ளனர். காரணம், இதுவரை தமிழக அரசியல்வாதிகள் மேற்கொண்ட சுற்றுப்பயணங்கள் தொடர் நடைமுறையாகவோ, அல்லது சில கட்டங்களாக பிரித்தோ நடக்கும்.
ஆனால், விஜய்யின் பயணம் செப்டம்பர் 13-ல் தொடங்கி டிசம்பர் 20-ல் நிறைவடைகிறது. மூன்றரை மாதங்களுக்குள், மொத்தம் 16 நாட்கள் மட்டுமே. அதிலும் ஒவ்வொரு வார சனிக்கிழமைகளில்தான் விஜயம் திட்டமிடப்பட்டுள்ளது. ஒரே நாளில் இரண்டு அல்லது மூன்று மாவட்டங்களைப் பார்ப்பது போல ஏற்பாடாகியுள்ளது.
முதலில், விஜய் தொகுதி வாரியாக, வீதிவீதியாக சந்திப்பார் எனும் செய்திகள் வெளிவந்தன. உடை ஒற்றுமை (‘டிரஸ் கோடு’) உட்பட ஜெகன் மோகன் ரெட்டியைப் போலவே செய்கிறார் என்பதால், அவரைப் போல் நடைபயணமே வரும் என தொண்டர்கள் நம்பினர். அந்த எதிர்பார்ப்புகளுக்கு பதிலாக ‘சனிக்கிழமை விஜயம்’ வந்திருக்கிறது.
ஏன் சனிக்கிழமை?
விஜய்யின் இந்தத் திட்டத்துக்கான காரணம் குறித்து பல யூகங்கள் உண்டு. சனி வார இறுதி என்பதால் தொண்டர்கள் எளிதாக கூட முடியும். மேலும், சனிக்கிழமையன்று பேசப்பட்ட பேச்சுக்கள் ஞாயிறு முழுவதும் வைரலாகும். அதே பீல்டில் அடுத்த சனிக்கிழமைக்கும் மீண்டும் பரவலாக பேசப்படும். இதை ஒரு வகையான பெரிய பிளான் என அரசியல் ஆய்வாளர்கள் நகைச்சுவையுடன் கூறுகின்றனர்.
ஆனால், பல கட்சியினர் ஏற்கனவே விஜய்யின் சனிக்கிழமை பயணத்தை சாட ஆரம்பித்துவிட்டனர். ‘முழுநேர அரசியல்வாதி தினமும் மக்களோடு தொடர்பில் இருக்க வேண்டும்; வார இறுதிகளில் மட்டும் வெளியே வருவது பொருத்தமில்லை. இது தவெகக் கட்சி சீரியசாக இல்லை என்பதையே காட்டும்’ என்கிறார்கள். பாஜக முன்னாள் தலைவர் அண்ணாமலை இதற்கென உடனடி விமர்சனமே செய்துள்ளார்.
தமிழக சட்டப்பேரவைத் தேர்தல் மார்ச் அல்லது ஏப்ரல் மாதத்தில் வரும் வாய்ப்பு உண்டு. அதனால் பல தலைவர்கள் தமிழகமெங்கும் சுழன்றுகொண்டிருக்கிறார்கள். திமுக தலைவர் ஸ்டாலின், கடந்த சில மாதங்களாகவே மக்களை சந்தித்து வருகிறார்; கேரவன் சந்திப்புகள், ரோடு ஷோக்கள் நடத்துகிறார்.
அதிமுக தலைவர் எடப்பாடி பழனிசாமி ‘மக்களை காப்போம்; தமிழகத்தை மீட்போம்’ என்ற பெயரில் தொகுதிகளுக்கு சென்று வருகிறார். ஏற்கனவே 150-க்கும் மேற்பட்ட இடங்களைச் சென்றடைந்துள்ளார். தேமுதிக பொதுச் செயலாளர் பிரேமலதா விஜயகாந்தும் தீவிரப் பிரசாரத்தில் உள்ளார்.
இந்நிலையில், விஜய் ஒரே நாளில் இரண்டு, மூன்று மாவட்டங்களுக்கு செல்வதாக அறிவித்துள்ளார். அப்படிச் சென்றால் ஒரு இடத்தில் அதிகபட்சம் ஒரு மணி நேரமே மக்களை சந்திப்பதற்கு வாய்ப்பு இருக்கும். அது போதுமா என்பது தொண்டர்களின் சந்தேகமாக உள்ளது.
மேலும், வரப்போகும் தேர்தல் சட்டப்பேரவை. அதனால் 234 தொகுதிகளுக்கும் நேரடியாகச் சென்று, அங்குள்ள வேட்பாளர்களை மக்களுக்குத் தெரியப்படுத்த வேண்டிய அவசியம் உண்டு. அந்த வேலைக்கு இந்த பயணம் உதவுமா என்ற கேள்வி எழுந்துள்ளது.
விஜய் டிசம்பரில் சுற்றுப்பயணத்தை முடித்துவிட்டால், அடுத்து நேராக தேர்தல் பிரசாரமே. கட்சி தொடங்கி இரண்டு ஆண்டுகள் ஆன நிலையில், மாநிலம் முழுவதும் அடித்தளத்தை வலுப்படுத்தாமல், நேரடியாக பிரசாரத்தில் இறங்குவது மக்களின் எதிர்வினையை பாதிக்கக்கூடும்.
விஜய் வந்தாலே கூட்டம் கூடும் என்பதால் அவர் வெளியில் வருவதில்லை என்ற விளக்கத்தை எவ்வளவு காலம் சொல்ல முடியும்? அந்தச் சித்திரத்தை உடைத்து, மக்களோடு மக்களாகக் கலந்தால்தான் அவர்களின் உண்மையான குரலைக் கேட்க முடியும். அதை விடுத்து சனிக்கிழமைகளில்தான் வருவேன் என்றால், மக்கள் அதைக் காணும் விதம் தேர்தல் காலத்தில்தான் தெரியும்.
