இந்தியாவின் ஜிடிபி 6.6% ஆக உயரும்: முந்தைய கணிப்பை விட 0.2% உயர்த்தியது ஐஎம்எப்
நடப்பு நிதியாண்டில் இந்திய பொருளாதார வளர்ச்சி 6.6% ஆக இருக்கும் என சர்வதேச நாணய நிதியம் (ஐஎம்எப்) தனது புதிய கணிப்பில் உயர்த்தியுள்ளது.
ஐஎம்எப் வெளியிட்ட உலக பொருளாதார கண்ணோட்ட அறிக்கையில் கூறியிருப்பதாவது: 2025-26 நிதியாண்டில் இந்தியாவின் மொத்த உள்நாட்டு உற்பத்தி (ஜிடிபி) 6.4% வளரும் என ஜூலை மாதம் வெளியிட்ட அறிக்கையில் குறிப்பிட்டிருந்தோம். ஆனால், முதல் காலாண்டில் நிறுவனங்களின் லாபம் கணிசமாக உயர்ந்தது. கடந்த 5 காலாண்டுகளில் இல்லாத வகையில், முதல் காலாண்டு ஜிடிபி 7.8% ஆக இருந்தது.
மேலும், உள்நாட்டு தேவை அதிகரித்தது, அரசின் செலவினம் உயர்ந்தது உள்ளிட்ட காரணங்களால், இந்தியாவின் ஜிடிபி வளர்ச்சி நடப்பு நிதியாண்டில் 6.6% ஆக உயரும் என ஐஎம்எப் தெரிவித்துள்ளது.
அதே நேரத்தில், இந்திய பொருட்களின் இறக்குமதிக்கு அமெரிக்கா கூடுதல் வரி விதித்துள்ளதால், 2026-27 நிதியாண்டில் இந்தியாவின் ஜிடிபி 6.2% ஆக குறையும். முந்தைய கணிப்பில் இது 6.4% ஆக இருக்கும் என கூறப்பட்டிருந்தது.
உலகளவில் 2025-26 நிதியாண்டில் சராசரி ஜிடிபி 3.2% ஆக இருக்கும் எனவும், 2026-27ல் இது 3.1% ஆகவும் குறையும் எனவும் அறிக்கையில் குறிப்பிடப்பட்டுள்ளது. 2024-25-ல் உலக சராசரி ஜிடிபி 3.3% ஆக இருந்தது. வளர்ந்த நாடுகளின் சராசரி ஜிடிபி 1.5% ஆக இருக்கும் என்றும் கூறப்பட்டுள்ளது.
இதில், அமெரிக்காவின் ஜிடிபி 2% வளரும் என மதிப்பிடப்பட்டுள்ளது. இதேபோல், இந்தியாவின் ஜிடிபி 6.3% வளரும் என உலக வங்கி முன்பு கணித்திருந்தது. பின்னர், அந்த கணிப்பை 6.5% ஆக உலக வங்கி கடந்த மாதம் உயர்த்தியது குறிப்பிடத்தக்கது.
ஐஎம்எப் கணிப்பின்படி, உலகில் வேகமாக வளரும் பொருளாதாரமாக இந்தியா திகழ்கிறது. விரைவில் ஜப்பானை பின்னுக்குத் தள்ளி 4-வது பெரிய பொருளாதாரமாகவும், அதன் பிறகு ஜெர்மனியை கடந்துவிட்டு 3-வது இடத்தைப் பிடிக்கும் என்றும் கூறப்பட்டுள்ளது.
