பஹல்காம் தாக்குதல் பாகிஸ்தானில் உருவான எல்லைத் தாண்டிய பயங்கரவாதத் திட்டம் – NIA குற்றப்பத்திரிக்கையில் வெளிச்சம்
ஜம்மு–காஷ்மீரின் பஹல்காம் பகுதியில் நடைபெற்ற கொடூர தாக்குதல், பாகிஸ்தானில் இருந்து திட்டமிடப்பட்ட சர்வதேச பயங்கரவாத சதியின் ஒரு பகுதியாகும் என்று தேசிய புலனாய்வு முகமை (NIA) நீதிமன்றத்தில் தாக்கல் செய்த குற்றப்பத்திரிக்கையில் தெளிவுபடுத்தியுள்ளது. 1,597 பக்கங்களைக் கொண்ட அந்த ஆவணத்தில், லஷ்கர்-ஏ-தொய்பா உள்ளிட்ட 7 பேரின் நேரடி மற்றும் மறைமுக பங்குகள் விரிவாக பதிவு செய்யப்பட்டுள்ளன.
கடந்த ஏப்ரல் 22-ம் தேதி பஹல்காமில் நடைபெற்ற இந்த தாக்குதலில், 25 சுற்றுலா பயணிகள் உட்பட மொத்தம் 26 பேர் உயிரிழந்தனர். நாடு முழுவதும் பெரும் அதிர்வலைகளை ஏற்படுத்திய இந்த சம்பவம் தொடர்பாக, பயங்கரவாத தடுப்பு அமைப்பான NIA தீவிர விசாரணை மேற்கொண்டு வந்தது.
விசாரணையின் அடிப்படையில் தயாரிக்கப்பட்ட குற்றப்பத்திரிக்கையில், இந்த தாக்குதல் முழுமையாக பாகிஸ்தானில் இருந்து திட்டமிடப்பட்டு, எல்லை தாண்டிய பயங்கரவாத அமைப்புகளின் வழிகாட்டுதலுடன் செயல்படுத்தப்பட்டதாக NIA தெரிவித்துள்ளது. தாக்குதல் திட்டமிடல், ஆயுத ஏற்பாடு, வழிகாட்டல் மற்றும் தகவல் பரிமாற்றம் ஆகிய அனைத்தும் பாகிஸ்தானிலிருந்து மேற்கொள்ளப்பட்டதாக ஆவணத்தில் குறிப்பிடப்பட்டுள்ளது.
லஷ்கர்-ஏ-தொய்பா மற்றும் அதன் முகமை அமைப்பான ‘தி ரெசிஸ்டன்ஸ் ஃப்ரண்ட்’ (TRF) இணைந்து இந்த தாக்குதலை முன்னெடுத்ததாக NIA கூறியுள்ளது. மத அடிப்படையிலான பதற்றத்தை உருவாக்கி, பொதுமக்களிடையே பயத்தையும் குழப்பத்தையும் ஏற்படுத்துவதே தாக்குதலின் முக்கிய நோக்கமாக இருந்ததாகவும் குற்றப்பத்திரிக்கை விளக்குகிறது. இதில் ஈடுபட்ட மூன்று பாகிஸ்தான் பயங்கரவாதிகள் பின்னர் இந்திய பாதுகாப்புப் படைகளால் சுட்டுக் கொல்லப்பட்டனர்.
இந்த வழக்கில் மொத்தம் 7 பேர் மீது NIA குற்றம் சாட்டியுள்ளது. பாகிஸ்தானில் இருந்து தாக்குதலை ஒருங்கிணைத்தவர்கள், தாக்குதலை நேரடியாக நடத்திய 3 பாகிஸ்தான் பயங்கரவாதிகள், தடை செய்யப்பட்ட லஷ்கர்-ஏ-தொய்பா அமைப்பு, அதன் பிரதிநிதி அமைப்பான TRF மற்றும் பயங்கரவாதிகளுக்கு உதவி செய்த இரு உள்ளூர் ஆதரவாளர்கள் ஆகியோர் இதில் அடங்குவர்.
இந்த தாக்குதலின் முக்கியத் திட்டமிடுபவராக சாஜித் ஜட் என்றழைக்கப்படும் ஹபிபுல்லா மாலிக் அடையாளம் காணப்பட்டுள்ளார். இஸ்லாமாபாத்தில் இருந்து செயல்பட்டு வரும் இவர், பாகிஸ்தானின் உளவுத்துறை அமைப்பான ISI-யுடன் நெருங்கிய தொடர்பில் இருப்பதாகவும் NIA தெரிவித்துள்ளது.
லஷ்கர்-ஏ-தொய்பாவின் மூத்த தளபதிகளில் ஒருவரான சாஜித் ஜட், காஷ்மீரில் TRF அமைப்பின் நடவடிக்கைகளை வழிநடத்தி வந்ததாக குற்றப்பத்திரிக்கை கூறுகிறது. இந்த தாக்குதலில் நேரடியாக ஈடுபட்ட ஃபைசல் ஜட், ஹபீப் தாஹிர் மற்றும் ஹம்சா அஃப்கானி ஆகியோர், கடந்த ஜூலை 29-ம் தேதி ஸ்ரீநகரின் டாசிகாம் வனப்பகுதியில் நடைபெற்ற ‘ஆபரேஷன் மகாதேவ்’ நடவடிக்கையில் பாதுகாப்புப் படைகளால் சுட்டுக் கொல்லப்பட்டனர்.
அவர்களிடமிருந்து கைப்பற்றப்பட்ட பாகிஸ்தானில் வாங்கப்பட்ட ஆண்ட்ராய்டு கைபேசிகள், பாகிஸ்தானுடன் இருந்த நேரடி தொடர்பை உறுதிப்படுத்தும் முக்கிய ஆதாரங்களாக இருப்பதாக NIA தெரிவித்துள்ளது.
மேலும், ஃபர்வைஸ் அகமது மற்றும் பஷீர் அகமது ஜோத்தார் ஆகிய இரு உள்ளூர்வாசிகள், பயங்கரவாதிகளுக்கு தங்குமிடம், உணவு மற்றும் தகவல் உதவி வழங்கியதாக கைது செய்யப்பட்டுள்ளனர்.
இந்த வழக்கில் லஷ்கர்-ஏ-தொய்பா அமைப்பின் மீதும், அதன் பிரதிநிதி அமைப்பான TRF மீதும் சட்டபூர்வமாகக் குற்றப்பத்திரிக்கை தாக்கல் செய்யப்பட்டுள்ளது. ஒரு நாட்டின் தேசிய புலனாய்வு அமைப்பு, லஷ்கர்-ஏ-தொய்பா மீது நேரடியாகக் குற்றப்பத்திரிக்கை தாக்கல் செய்வது இதுவே முதல் முறை என்பதும் குறிப்பிடத்தக்கது.
இந்த வழக்கு தொடர்பான விசாரணை இன்னும் தொடர்ந்துவருவதாக NIA தெரிவித்துள்ள நிலையில், எதிர்காலத்தில் புதிய ஆதாரங்கள், நிதி பரிவர்த்தனைகள் மற்றும் சர்வதேச தொடர்புகள் குறித்த கூடுதல் தகவல்கள் வெளிவரும் வாய்ப்பு இருப்பதாகவும் கூறப்பட்டுள்ளது.
