புனே தொழிலாளியின் பழைய புகைப்படம் வைரல் – புதிய சர்ச்சையை கிளப்பும் எக்ஸ் பதிவுகள்!
அமெரிக்காவை தளமாகக் கொண்ட சில எக்ஸ் கணக்குகள், இந்தியர்களை குறிவைத்து இனவெறியும், எதிர் குடியேற்ற உணர்வுகளும் அடங்கிய பிரச்சாரங்களை தீவிரப்படுத்தி வரும் நிலையில், புனேவை சேர்ந்த கூலி தொழிலாளி ராஜேந்திர பஞ்சாலின் பழைய புகைப்படங்களை தவறாக பயன்படுத்தியுள்ளனர். அந்த படங்களில் அவர் இருந்த உடல்நிலை குறித்து இகழ்ச்சியாக கருத்துகள் பதிவானதால், இது தற்போது சமூக வலைதளங்களில் பெரும் விவாதமாகியுள்ளது.
அந்த படங்களில் காணப்படுபவர் 40 வயதான ராஜேந்திர பஞ்சால். புனேவில் கூலி வேலை செய்து வந்த அவர், சிறுவயதிலிருந்து கடுமையான தாடை இயக்கக் கோளாறால் அவதிப்பட்டு வந்தார். ஒரு வயதில் ஏற்பட்ட விபத்தில் தாடை எலும்பு முறிந்ததால், அது மெதுவாக இணைந்து, தலையோடு ஒட்டிவிடும் நிலை ஏற்பட்டு, வாயை திறக்க முடியாத சூழ்நிலை வந்தது.
இந்த அரிதான நிலை மருத்துவ ரீதியில் “Temporomandibular joint ankylosis” என்று அழைக்கப்படுகிறது. பொருளாதார பிரச்சனைகளால் முறையான சிகிச்சைக்குச் செல்ல முடியாததால், அவர் சுமார் 40 ஆண்டுகள் வரை வாயை முழுமையாக திறக்க முடியாத வாழ்க்கையை நெருக்கடியில் வாழ வேண்டியிருந்தது.
அந்த காலத்தில் அவர் கஞ்சி போன்று திரவ உணவுகளை மட்டுமே எடுத்துக்கொண்டார்; இதனால் ஊட்டச்சத்து குறைபாடுகள், உடல் சோர்வு மற்றும் பல சிக்கல்கள் ஏற்பட்டு வாழ்க்கை மிகக் கடினமானதாக மாறியது.
ஆனால் 2017 ஆம் ஆண்டு ஒரு திருப்புமுனை உருவானது. புனேவின் தாடை மற்றும் முக சிகிச்சை நிபுணர் மருத்துவர் சமீர் கார்தே தலைமையிலான மருத்துவர்கள் குழு அவருக்கு இலவசமாக முக்கிய அறுவை சிகிச்சை செய்து, பல தசாப்தங்கள் கழித்து அவர் திட உணவுகளை சாப்பிடக்கூடிய நிலையை ஏற்படுத்தினர். புனே பல் மருத்துவக் கல்லூரியின் மருத்துவர்களும் இதில் பங்கேற்றனர்.
இவ்வளவு தனிப்பட்ட மருத்துவப் பின்னணி கொண்ட ராஜேந்திர பஞ்சாலின் இந்த பழைய புகைப்படங்களையே, சமீபத்தில் சில அமெரிக்க எக்ஸ் கணக்குகள் தவறான நோக்கத்திற்காக பயன்படுத்தத் தொடங்கின. இந்தியர்களை இழிவு படுத்தவும், குடியேற்ற எதிர்ப்பு கருத்துகளை தூண்டவும் அந்த படங்கள் பயன்படுத்தப்பட்டன.
குறிப்பாக, H-1B விசா விவகாரத்தை முன்னிறுத்தி, பஞ்சாலின் உடல்நிலை குறித்து கேலிசெய்யும் பதிவுகள் வைரலாகின. ஒரு பதிவுக்கு மட்டும் 11 மில்லியன் பார்வைகள் கிடைத்ததாக கூறப்படுகிறது. verified கணக்குகளும் கூட அந்த படங்களை ஒட்டி இந்தியர்களை குறைசொல்லும் கருத்துகளை பகிர்ந்ததாக தெரிவிக்கப்பட்டுள்ளது.
இந்த தவறான தகவல்களை முதலில் கண்டறிந்து வெளிப்படுத்தியது ஒரு சுயாதீன உண்மைத் தணிக்கை குழு. அவர்கள், பஞ்சாலின் மருத்துவ வரலாறு, அறுவை சிகிச்சை, அவதிப்பட்ட நிலை ஆகியவற்றை முழுமையாக விளக்கி, அந்த புகைப்படத்திற்கும் குடியேற்ற சர்ச்சைக்கும் எந்தத் தொடர்பும் இல்லை என்பதை தெளிவுபடுத்தினர்.
இதேவேளை, “Center for the Study of Organized Hate” வெளியிட்ட ஆய்வில், டொனால்ட் டிரம்பின் இரண்டாவது பதவியேற்புக்குப் பிறகு, இந்தியர்களை குறிவைக்கும் வெறுப்பு பதிவுகள் எக்ஸ் தளத்தில் கடுமையாக அதிகரித்துள்ளன என்றும், குறிப்பாக சுகாதாரம், தோற்றம், கலாச்சாரம் குறித்த இகழ்ச்சிப் பேச்சுகள் அதிகம் பதிவாகின்றன என்றும் கூறப்பட்டுள்ளது.
2017 அறுவை சிகிச்சைக்குப் பிறகு ராஜேந்திர பஞ்சால் இப்போது இயல்பான வாழ்க்கையை மகிழ்ச்சியாக வாழ்ந்து வருகிறார். இந்நிலையில், அனுமதியின்றி அவரது பழைய புகைப்படத்தை எடுத்து இவ்வாறு தவறாக பயன்படுத்தும் செயல்கள் பரவலான கண்டனத்தை கிளப்பியுள்ளன.
