சென்னை உள்ளிட்ட ஏழு மாவட்டங்களுக்கு இன்று ஆரஞ்சு எச்சரிக்கை அறிவிக்கப்பட்டுள்ளது. வங்கக்கடலில் உருவாகியுள்ள காற்றழுத்த தாழ்வு பகுதியின் தாக்கத்தால், தமிழகத்தின் 15 மாவட்டங்களில் கனமழை பெய்ய வாய்ப்பு இருப்பதாக வானிலை ஆய்வு மையம் தெரிவித்துள்ளது.
இது தொடர்பாக சென்னை மண்டல வானிலை மையம் வெளியிட்ட அறிக்கையில் கூறப்பட்டதாவது: இலங்கை கடற்கரைப் பகுதி அருகிலும், தென்–மேற்கு வங்கக்கடல் பகுதிகளிலும் தற்போதும் காற்றழுத்தம் குறைந்த பகுதிகள் காணப்படுகின்றன. இந்த அமைப்பு வடமேற்கு திசையில் மெல்ல நகரும் வாய்ப்பு உள்ளது. இதன் விளைவாக இன்று (நவம்பர் 17) தமிழக கடலோர மாவட்டங்களின் பல இடங்களில், உள்நாட்டுப் பகுதிகளின் சில இடங்களில், மேலும் புதுச்சேரி, காரைக்கால் பகுதிகளில் இடி-மின்னலுடன் கூடிய லேசானது முதல் மிதமான மழை பெய்யக்கூடும் என கூறப்பட்டுள்ளது.
நாளை தென் தமிழக மாவட்டங்களில் பெரும்பாலான இடங்களிலும், வட தமிழகத்தின் சில பகுதிகளிலும் மழை தொடரும். 19ஆம் தேதி தமிழகத்தின் ஓரிரு இடங்களில், 20ஆம் தேதி மற்றும் 21, 22ஆம் தேதிகளில் சில இடங்களில் இடி-மின்னலுடன் கூடிய லேசான அல்லது மிதமான மழை பெய்யும் வாய்ப்பு உள்ளது.
இன்று சென்னை, செங்கல்பட்டு, திருவள்ளூர், காஞ்சிபுரம், மயிலாடுதுறை, நாகப்பட்டினம், திருவாரூர் மாவட்டங்களில் சில இடங்களில், காரைக்காலிலும் கனமழை முதல் மிக கனமழை வரை ஏற்படக்கூடும். கடலூர், விழுப்புரம், தஞ்சாவூர், புதுக்கோட்டை, ராமநாதபுரம், தூத்துக்குடி, திருநெல்வேலி, கன்னியாகுமரி மாவட்டங்களிலும், புதுவையிலும் கனமழை பெய்ய வாய்ப்பு அதிகம்.
நாளை கன்னியாகுமரி, திருநெல்வேலி, தூத்துக்குடி, ராமநாதபுரம், சிவகங்கை, விருதுநகர், தென்காசி, தேனி மாவட்டங்களில் மழை பொழியலாம். வரும் 19ஆம் தேதி மயிலாடுதுறை மற்றும் கடலூர் மாவட்டங்களில், 20ஆம் தேதி கடலூர், மயிலாடுதுறை, விழுப்புரம், செங்கல்பட்டு மாவட்டங்களில் கனமழை வரும். 21ஆம் தேதி திருவள்ளூர், காஞ்சிபுரம், சென்னை, செங்கல்பட்டு, விழுப்புரம், கடலூர், மயிலாடுதுறை, நாகப்பட்டினம், திருவாரூர், தஞ்சாவூர், புதுக்கோட்டை, ராமநாதபுரம், தூத்துக்குடி, திருநெல்வேலி, கன்னியாகுமரி, சிவகங்கை, அரியலூர் மாவட்டங்களில் ஓரிரு இடங்களில் கனமழை பெய்யலாம்.
சென்னை மற்றும் அருகிலுள்ள பகுதிகளில் இன்று வானம் பகுதி மேகமூட்டத்துடன் காணப்படும். நகரின் சில இடங்களில் இடி-மின்னலுடன் மிதமானது முதல் கனமழை வரை பெய்யக்கூடும். தமிழக கடற்கரை, மன்னார் வளைகுடா, குமரிக்கடல் போன்ற பகுதிகளில் இன்று மணிக்கு 35–45 கி.மீ. வேகத்தில், இடையிடையே 55 கி.மீ. வேகத்திலும் பலத்த காற்று வீசக்கூடும். எனவே, மீனவர்கள் இந்த பகுதிகளுக்கு செல்ல வேண்டாம் என்று எச்சரிக்கப்பட்டுள்ளது.
