கரூர் வெண்ணெய்மலை கோயில் நில ஆக்கிரமிப்பு கடைகளுக்கு சீல் — பொதுமக்கள் போராட்டம்
கரூர் வெண்ணெய்மலை பகுதியில் உள்ள பாலசுப்பிரமணிய சுவாமி கோயில் நிலத்தில் அமைந்துள்ள ஆக்கிரமிப்பு கடைகளுக்கு இந்து சமய அறநிலைத்துறை அதிகாரிகள் சீல் வைத்ததற்கு எதிராக, பொதுமக்கள் போராட்டம் நடத்தினர்.
கரூர் வெண்ணெய்மலை பகுதியில் உள்ள இந்த கோயிலுக்கு 547 ஏக்கர் நிலம் உள்ளது. இந்த நிலத்தின் மீது பலர் குடியிருப்புகள் கட்டி வசித்து வந்ததாக தெரிவிக்கப்படுகிறது. இந்த நிலம் மீது ஆக்கிரமிப்பு நடந்ததாகக் கூறி, திருத்தொண்டர் சபை தலைவர் ராதாகிருஷ்ணன் 2019 ஆம் ஆண்டு மதுரை உயர்நீதிமன்ற கிளையில் வழக்கு தொடர்ந்தார்.
அரசு அதிகாரிகள் தேவையான நடவடிக்கை எடுக்கவில்லை என கூறி, பின்னர் நீதிமன்ற அவமதிப்பு மனுவும் தாக்கல் செய்யப்பட்டது. இதன் விளைவாக சமீப நாட்களில் கோயில் நிலங்களில் அறிவிப்பு பலகை வைக்கும் பணியும், ஆக்கிரமிப்பு கடைகளை மூடும் பணியும் நடைபெற்று வருகிறது.
கடந்த வியாழக்கிழமை மட்டும் ஒரே நாளில் ஒரு ஏக்கர் நிலம் ஆக்கிரமிக்கப்பட்டதாக குற்றச்சாட்டு எழுந்தது. இதையடுத்து, அந்த இடத்தில் கோயிலுக்குச் சொந்தமான நிலம் என அறிவிப்பு பலகை வைக்கப்பட்டது. இந்த விவகாரம் மீண்டும் வெள்ளிக்கிழமை நீதிமன்ற விசாரணைக்கு வரவுள்ளது.
பழைய கரூர்–சேலம் சாலையில் வெண்ணெய்மலை அருகே உள்ள நான்கு கடைகளுக்கு சீல் வைக்கும் நடவடிக்கை மேற்கொள்ளப்பட்டதால், அப்பகுதி மக்கள் சாலை ஓரத்தில் காத்திருப்பு போராட்டத்தில் ஈடுபட்டனர். இந்த சூழ்நிலையில் அதிகப்படியான போலீஸ் புலனாய்வு ஏற்பாடு செய்யப்பட்டது. போராட்டத்தின்போது ஒரு பெண் மயக்கம் அடைந்து மருத்துவமனைக்கு கொண்டு செல்லப்பட்டார். போலீஸார் போராட்டக்காரர்களுடன் பேச்சுவார்த்தை நடத்தி வருவதால் அப்பகுதியில் பதட்ட நிலை நிலவுகிறது.
