“அரசுப் பள்ளிகளில்தான் சாதி மோதல்கள்; தனியார் பள்ளிகளில் இல்லை” — அண்ணாமலை குற்றம்
தமிழகத்தில் அரசுப்பள்ளி மாணவர்களுக்கு இடையே சாதி சார்ந்த மோதல்கள் அதிகரித்து வருவதாகவும், இது தனியார் பள்ளிகளில் காணப்படவில்லை என்றும், பாஜகவின் முன்னாள் மாநிலத் தலைவர் அண்ணாமலை தெரிவித்துள்ளார்.
இந்தப் பற்றி வெளியிட்ட அறிக்கையில் அவர் கூறியதாவது:
மத்திய கல்வித் துறையின் ‘யுடிஐஎஸ்இ பிளஸ்’ அறிக்கையில், தமிழகத்தில் பள்ளி விடுப்போர் விகிதம் கடந்த ஆண்டுகளுடன் ஒப்பிடுகையில் மிக அதிகமாக உயர்ந்துள்ளது. கல்வியில் தமிழ்நாட்டை பின்தள்ளியதற்கு திமுக அரசே காரணம்.
2020-21ஆம் ஆண்டில் தொடக்க நிலைப் பள்ளிகளில் மாணவர் இடைநிறுத்த விகிதம் 0.6% இருந்த நிலையில், 2024-25ல் அது 2.7% ஆக உயர்ந்துள்ளது. உயர்நிலைப் பள்ளிகளில் இந்த எண்ணிக்கை 6.4% லிருந்து 8.5% ஆக உயர்ந்துள்ளது. தனியார் பள்ளிகளில் கிடைக்கும் மும்மொழிக் கல்வி போன்ற வாய்ப்புகள், ஏழை மற்றும் பின்தங்கிய அரசுப் பள்ளி மாணவர்களுக்கு மறுக்கப்படுகின்றன.
தனியார் பள்ளிகளில் மாணவர்களுக்கிடையே சாதி மோதல்கள் ஏற்படுவதில்லை. ஆனால், பல்வேறு மாவட்டங்களில் உள்ள அரசுப் பள்ளிகளில், குறிப்பாக கல்வி அமைச்சர் சொந்த மாவட்டத்தில் கூட, மாணவர்களுக்கிடையே சாதி முரண்பாடுகள் அதிகரித்துள்ளன. சில இடங்களில் பள்ளி கட்டிடம் இல்லாமல் மரத்தடியில் பாடங்கள் நடத்தப்படுவது, பழுதடைந்த கட்டிடங்கள் இடிந்து விழுவது போன்ற சம்பவங்கள் தொடர்கின்றன.
இத்தகைய துயரமான சூழ்நிலையில், முதல்வரும் கல்வி அமைச்சரும் விளம்பரங்களில் நேரத்தை வீணடிக்காமல் கல்வித் துறையின் சீர்கேட்டை உணர்ந்து நடவடிக்கை எடுக்க வேண்டிய நேரம் இது,” என அவர் கூறியுள்ளார்.
