இஸ்ரேல்–ஹமாஸ் பேச்சுவார்த்தையில் முன்னேற்றம்: 20 அம்ச திட்டத்தை முன்வைத்த ட்ரம்ப்
இஸ்ரேல் அரசு மற்றும் ஹமாஸ் அமைப்பு இடையிலான அமைதி பேச்சுவார்த்தை எகிப்தின் ஷர்ம் எல் ஷேக் நகரில் நடைபெற்று வருகிறது. இந்த பேச்சுவார்த்தையில் முன்னேற்றம் ஏற்பட்டுள்ளதாக தகவல்கள் வெளியாகியுள்ளன.
கடந்த இரண்டு ஆண்டுகளாக இஸ்ரேல் ராணுவத்துக்கும் ஹமாஸ் அமைப்பிற்கும் இடையே காசா பகுதியில் போர் நடைபெற்று வருகிறது. இந்த மோதலை முடிவுக்கு கொண்டுவர அமெரிக்காவின் முன்னாள் அதிபர் டொனால்ட் ட்ரம்ப் 20 அம்சங்களைக் கொண்ட அமைதி திட்டத்தை முன்மொழிந்துள்ளார்.
ட்ரம்ப் முன்வைத்த திட்டத்தின் முக்கிய அம்சங்கள்:
- போரால் சிதைந்த காசா பகுதி மீண்டும் கட்டியெழுப்பப்படும்
- தீவிரவாதம் முற்றிலும் ஒழிக்கப்படும்
- ஹமாஸ் பிடியில் உள்ள இஸ்ரேல் பிணைக்கைதிகள் உடனடியாக விடுவிக்கப்பட வேண்டும்
- உயிரிழந்தவர்களின் உடல்கள் ஒப்படைக்கப்பட வேண்டும்
- போர்நிறுத்தம் பிறகு இஸ்ரேல் ராணுவம் படிப்படியாக காசாவிலிருந்து வெளியேறும்
- ஹமாஸ் ஆயுதம் கைவிட்டு சரணடைய வேண்டும்
- ஹமாஸ் உறுப்பினர்களுக்கு பொதுமன்னிப்பு; பாதுகாப்புடன் வெளிநாடுகளில் குடியேற அனுமதி
- ஹமாஸுக்கு புதிய நிர்வாகத்தில் இடமில்லை
- காசாவை உள்ளூர் தலைவர்களைக் கொண்ட புதிய நிர்வாக குழு நடத்தும்; ட்ரம்ப் மற்றும் டோனி பிளேர் உள்ளிட்டோர் சர்வதேச மேற்பார்வை
- காசாவில் சிறப்பு பொருளாதார மண்டலம் உருவாக்கி முதலீடுகள், வேலைவாய்ப்புகள் அதிகரிக்கும்
- சர்வதேச படை ‘ஐஎஸ்எப்’ பாதுகாப்பு பொறுப்பை ஏற்கும்
இத்திட்டத்தை முன்னிட்டு, இஸ்ரேல் அமைச்சரான ரோன் டெர்மர் தலைமையிலான குழுவும், ஹமாஸ் மூத்த தலைவர் காலில் அல்–ஹையா தலைமையிலான குழுவும் பேச்சில் ஈடுபட்டு வருகின்றன. இரண்டாவது நாளாக நேற்று பேச்சுவார்த்தை நடைபெற்றது.
அமெரிக்க அதிபர் ட்ரம்பின் மருமகன் ஜெராட் குஷ்னர் மற்றும் அமெரிக்க சிறப்பு தூதர் விட்காப் ஆகியோர் இன்று பேச்சுவார்த்தையில் பங்கேற்க உள்ளனர். இதனால் முக்கிய உடன்பாடு அறிவிக்கப்படும் வாய்ப்பு உள்ளது.
அமெரிக்க வட்டாரங்கள் தெரிவித்ததாவது:
“ஹமாஸ் நிறுவனம் பிணைக்கைதிகளை விடுவித்து, உயிரிழந்தவர்களின் உடல்களை ஒப்படைத்தால் உடனடியாக போர்நிறுத்த ஒப்பந்தம் கையெழுத்தாகும்“ என கூறியுள்ளனர்.
