“அந்த நிறுவனத்தை நம்பியதே மோசம்” – கள ஆய்விலும் ‘உடன்பிறப்புகள்’ தளத்திலும் குமுறும் திமுக தொண்டர்கள்: சேகர்பாபு மீது திரும்பும் கொளத்தூர் புகார்!
நடைபெற்று முடிந்த தமிழகச் சட்டமன்றத் தேர்தலில், இரண்டாவது முறையாகத் தொடர் ஆட்சியமைப்போம் என முழங்கிய திமுக படுதோல்வியைச் சந்தித்ததைத் தொடர்ந்து, தோல்விக்கான காரணங்களை ஆராயும் கள ஆய்வுக் குழுவிலும், கட்சியின் ‘உடன்பிறப்புகள்’ இணையப் பக்கத்திலும் அடிமட்டத் தொண்டர்கள் தங்களது ஒட்டுமொத்த ஆதங்கத்தையும் கொட்டித் தீர்த்து வருகின்றனர். இத்தேர்தலில் தவெக (TVK) 107 இடங்களில் தனிப்பெரும் வெற்றியைப் பெற்று, கூட்டணிக் கட்சிகளின் ஆதரவோடு புதிய ஆட்சி அமைத்துள்ள சூழலில், திமுக தலைவர் மு.க.ஸ்டாலின் மற்றும் பொதுச்செயலாளர் துரைமுருகன் உள்ளிட்ட அக்கட்சியின் மூத்த தலைவர்கள் பலர் தங்களது சொந்தத் தொகுதிகளிலேயே அதிர்ச்சித் தோல்வியைக் கண்டுள்ளனர். இதற்கான காரணங்களைப் புரிந்துகொள்ளத் தொடங்கப்பட்ட ‘உடன்பிறப்புகள்’ இணையத்தளத்தில், காலக்கெடு முடிவடைந்த நிலையில் சுமார் 5 லட்சத்திற்கும் அதிகமானோர் தங்களது புகார்களைப் பதிவு செய்துள்ளனர். அதில் பெரும்பாலான தொண்டர்கள், களத்தில் பல ஆண்டுகளாக உழைத்த தங்களது உணர்வுகளுக்கு மதிப்பளிக்காமல், ‘பென்’ (PEN) எனும் தேர்தல் வியூக நிறுவனத்தை முழுமையாக நம்பித் தேர்தலைச் சந்தித்ததே இந்த வரலாற்றுப் படுதோல்விக்கு மிக முக்கியக் காரணம் எனக் குற்றம் சாட்டியுள்ளனர்.
பென் நிறுவனத்தின் சர்வே மோசடிப் புகார்: அடிமட்ட நிர்வாகிகள் மற்றும் தொண்டர்களின் குமுறல்களின்படி, ‘பென்’ நிறுவனத்தினர் கள ஆய்வு மற்றும் சர்வே என்ற பெயரில் மிகப் பெரிய ஏமாற்று வேலையைச் செய்துள்ளதாகக் கூறப்படுகிறது. களத்தின் உண்மையான நிலவரத்தைக் கட்சித் தலைமைக்குத் தெரிவிக்காமல் மறைத்துவிட்டு, தங்களுக்குச் சாதகமான போலி அறிக்கைகளை மட்டுமே வழங்கித் தலைமையைத் தவறாக வழிநடத்தியுள்ளனர் என்ற குற்றச்சாட்டு வலுத்துள்ளது.
இதற்கிடையே, திமுக தலைவர் ஸ்டாலினின் அறிவுறுத்தலின்படி தொகுதி வாரியாகக் கடுமையான கள ஆய்வில் ஈடுபட்டுள்ள ஆய்வுக்குழுவின் முன்னிலையிலும் தொண்டர்கள் உண்மைகளைப் பேசி வருகின்றனர். “பெரியண்ணன் தொனியில் செயல்பட்ட அமைச்சர்கள் மற்றும் தாங்கள் சொல்வதை மட்டும்தான் கேட்க வேண்டும் என உத்தரவு பிறப்பித்த மூத்த நிர்வாகிகளின் ஆணவப் போக்கே” தோல்வியைத் தேடித்தந்தது எனப் பலரும் சுட்டிக்காட்டியுள்ளனர். இதில் உச்சகட்டமாக, கொளத்தூர் தொகுதியில் திமுக தலைவர் மு.க.ஸ்டாலின் தோற்றதற்கான காரணங்களை ஆராயும்போது, ஒட்டுமொத்தப் புகார்களும் முன்னாள் அமைச்சர் சேகர்பாபுவின் மீதே திரும்பியுள்ளது. “சென்னையின் முதலமைச்சராகத் தன்னைத் தானே நிறுத்திக்கொண்டு, தன்னை மீறி எதுவும் நடக்காது என்ற ஆணவத்தில் சேகர்பாபு செயல்பட்டதே ஸ்டாலினின் தோல்விக்குக் காரணம்” என அப்பகுதி நிர்வாகிகள் வெளிப்படையாகக் கூறியுள்ளனர். தேர்தலுக்கு முன்பாக, “திமுக தோற்கும் தொகுதிகளின் மாவட்டச் செயலாளர்கள் பதவி பறிக்கப்படும்” என ஸ்டாலின் எச்சரித்திருந்த நிலையில், தற்போது கொளத்தூர் மாவட்டச் செயலாளரான சேகர்பாபுவின் பதவியை உடனடியாகப் பறிக்க வேண்டும் என்ற கோரிக்கையும் எழுந்துள்ளது. வியூக நிறுவனங்களின் நாடகங்களை நம்பாமல், உழைக்கும் உண்மையான தொண்டர்களை மதித்துத் தலைமை அதிரடி நடவடிக்கை எடுக்க வேண்டும் என்பதே தற்போது அறிவாலய வட்டாரத்தின் பிரதான குமுறலாக உள்ளது.
