தமிழக முதல்-அமைச்சர், அமைச்சர்கள் மற்றும் எம்.எல்.ஏ.க்களின் மாத சம்பளம் எவ்வளவு? – சலுகைகளுடன் ஒரு விரிவான பார்வை!
சென்னை: ஜனநாயக நாடான இந்தியாவில் மக்கள் பணியாற்றும் நாடாளுமன்ற மற்றும் சட்டமன்ற உறுப்பினர்களுக்கு மாத ஊதியமும், பல்வேறு படித்தொகைகளும் வழங்கப்பட்டு வருகின்றன. இதில் நாடாளுமன்ற உறுப்பினர்களுக்கான (MP) ஊதியம் நாடு முழுவதும் ஒரே சீராக இருந்தாலும், சட்டமன்ற உறுப்பினர்களின் (MLA) ஊதியம் மாநிலத்திற்கு மாநிலம் மாறுபடுகிறது. அந்த வகையில், தமிழ்நாட்டில் புதிதாகப் பொறுப்பேற்றுள்ள த.வெ.க. (தமிழக வெற்றிக் கழகம்) அரசில் முதல்-அமைச்சர், அமைச்சர்கள் மற்றும் எம்.எல்.ஏ.க்களுக்கு வழங்கப்படும் சம்பளம் மற்றும் இதர சலுகைகள் குறித்த விவரங்கள் வெளியாகியுள்ளன.
தமிழகத்தில் கடந்த 2008-ம் ஆண்டு ரூ.30 ஆயிரமாக இருந்த எம்.எல்.ஏ.க்களின் சம்பளம், பல்வேறு காலகட்டங்களில் உயர்த்தப்பட்டு, இறுதியாக 2017-ம் ஆண்டு அ.தி.மு.க. ஆட்சிக் காலத்தில் ரூ.55 ஆயிரத்தில் இருந்து ரூ.1 லட்சத்து 5 ஆயிரமாக அதிரடியாக அதிகரிக்கப்பட்டது. இதுவே தற்போதும் நடைமுறையில் உள்ளது. கடந்த 2024-ம் ஆண்டு மே மாதம் திருத்தப்பட்ட விதிகளின்படி, மக்கள் பிரதிநிதிகள் அனைவருக்கும் அடிப்படைச் சம்பளம் ரூ.30 ஆயிரம் மட்டுமே என்றபோதிலும், இதர படித்தொகைகள் மற்றும் சலுகைகள் சேர்க்கப்பட்டு முழுமையான மாத ஊதியம் கணக்கிடப்படுகிறது.
சம்பள விவரங்கள் மற்றும் படித் தொகைகள்:
- முதல்-அமைச்சரின் மாத சம்பளம்: ரூ.2 லட்சத்து 5 ஆயிரம் (கூடுதலாக அரசு வீடு, கார், பலத்த பாதுகாப்பு வசதிகள் வழங்கப்படும்).
- அமைச்சர்கள், சபாநாயகர், துணை சபாநாயகர் & எம்.எல்.ஏ.க்கள் சம்பளம்: ரூ.1 லட்சத்து 5 ஆயிரம் (அமைச்சர்களுக்குக் கூடுதலாக அரசு வீடு மற்றும் கார் வழங்கப்படும்).
இந்த ரூ.1 லட்சத்து 5 ஆயிரம் மாதச் சம்பளத்திற்குள், மாதாந்திரப் படி ரூ.10 ஆயிரம், தொகுதிப்படி ரூ.25 ஆயிரம், வாகனப்படி ரூ.25 ஆயிரம், தொலைபேசிப்படி ரூ.7,500, தொகுப்புப்படி ரூ.5 ஆயிரம் மற்றும் அஞ்சல்படி ரூ.2,500 ஆகியவை உள்ளடக்கமாக உள்ளன.
ஏராளமான சலுகைகள்: இதுதவிர, எம்.எல்.ஏ.க்களுக்கு இலவச மருத்துவ வசதி, விமானம், ரயில் மற்றும் பேருந்துகளில் பயணம் செய்வதற்கான இலவச டிக்கெட்டுகள் வழங்கப்படுகின்றன. மேலும், அவர்கள் தங்களின் தொகுதி அலுவலகத்தை நிர்வகிக்க ஒரு நபரை வேலைக்கு அமர்த்திக் கொள்ளலாம்; அதற்கான ஊதியத்தையும் அரசே வழங்குகிறது. எல்லாவற்றிற்கும் மேலாக, சட்டமன்றக் கூட்டத்தொடர் அல்லது துறை சார்ந்த கூட்டங்களில் பங்கேற்கும் நாட்களுக்குத் தனிப்படியாக நாள் ஒன்றுக்குத் தலா ரூ.2,500 வரை கணக்கிடப்பட்டு வழங்கப்படுகிறது குறிப்பிடத்தக்கது.
