தமிழக அமைச்சரவை 3 நாட்களில் விரிவாக்கம்: கூட்டணி கட்சிகளுக்கு ஆட்சியில் பங்கு! – பட்ஜெட் கூட்டத்தொடர் எப்போது?
சென்னை: தமிழகத்தின் புதிய முதலமைச்சராகத் தமிழக வெற்றிக் கழகத்தின் தலைவர் ஜோசப் விஜய் கடந்த 10-ஆம் தேதி பொறுப்பேற்றுக் கொண்டதைத் தொடர்ந்து, அடுத்த 3 நாட்களில் தமிழக அமைச்சரவை விரிவுபடுத்தப்பட உள்ளதாகத் நம்பத்தகுந்த வட்டாரங்கள் தெரிவிக்கின்றன. விக்கிரவாண்டி மாநாட்டில் அறிவித்தபடி, கூட்டணி கட்சிகளுக்கு ஆட்சியில் பங்கு என்ற வாக்குறுதியை முதலமைச்சர் விஜய் முறைப்படி அமல்படுத்த உள்ளார்.
கூட்டணி கட்சிகளுக்கு எத்தனை இடங்கள்?
17-வது சட்டமன்றத் தேர்தலில் வெற்றி பெற்று முதலமைச்சருடன் சேர்த்து முதற்கட்டமாக 9 பேர் அமைச்சர்களாகப் பதவி ஏற்றுக்கொண்டனர். ஒட்டுமொத்தமாகச் சட்டமன்றத்தில் 34 அமைச்சர்கள் இடம்பெற வாய்ப்புள்ளதாகக் கூறப்படுகிறது. இதில் ஆளுங்கட்சியான த.வெ.க-விற்கு 26 இடங்கள் கிடைக்கக்கூடும்.
கூட்டணிப் பங்கீட்டின்படி:
- தேர்தலுக்குப் பின்பு த.வெ.க-வுடன் கைகோர்த்த காங்கிரஸ் கட்சிக்கு 2 இடங்கள் ஒதுக்கப்பட உள்ளதாகத் தெரிகிறது.
- அதிமுகவிலிருந்து பிரிந்து ஆதரவளித்த எஸ்.பி.வேலுமணி அணியினருக்கு 5 இடங்கள் வழங்கப்பட வாய்ப்புள்ளது.
- திமுக கூட்டணியிலிருந்து விலகி த.வெ.க-விற்கு ஆதரவளித்துள்ள விடுதலைச் சிறுத்தைகள் கட்சியும் (விசிக) ஒரு இடத்தை எதிர்பார்ப்பதால், அதுகுறித்த ஆலோசனைகளும் தீவிரமாக நடைபெற்று வருகின்றன.
அடுத்த 3 நாட்களில் இறுதிப் பட்டியல் தயாரானதும், சென்னை கிண்டியில் உள்ள ஆளுநர் மாளிகையில் புதிய அமைச்சர்களுக்கு ஆளுநர் அர்லேக்கர் பதவிப்பிரமாணம் செய்து வைப்பார். அதன் பின்னரே அமைச்சர்களுக்கான துறைகள் அதிகாரப்பூர்வமாக ஒதுக்கப்படும்.
சட்டமன்றக் கூட்டம் மற்றும் பட்ஜெட் தாக்கல்:
அமைச்சரவை விரிவாக்கத்தைத் தொடர்ந்து, புதிய அரசின் முதல் சட்டமன்றக் கூட்டம் ஆளுநர் உரையுடன் முறைப்படி தொடங்கவுள்ளது. ஆளுநர் உரைக்கு நன்றி தெரிவிக்கும் தீர்மானத்தின் மீதான விவாதம் 3 நாட்கள் நடைபெறும். இதன் நிறைவு நாளில் முதலமைச்சர் ஜோசப் விஜய் விரிவான பதிலுரை வழங்குவார்.
அதனைத் தொடர்ந்து, புதிய அரசின் 2026-27-ஆம் ஆண்டிற்கான நிதிநிலை அறிக்கை (பட்ஜெட்) தாக்கல் செய்யப்பட உள்ளது. முந்தைய திமுக ஆட்சியில் பொது பட்ஜெட் மற்றும் வேளாண் பட்ஜெட் தனித்தனியாகத் தாக்கல் செய்யப்பட்ட நிலையில், இந்த முறை அவை ஒன்றாகத் தாக்கல் செய்யப்படுமா அல்லது தனித்தனியாக இருக்குமா என்ற எதிர்பார்ப்பு எழுந்துள்ளது.
பட்ஜெட் விவாதம் மற்றும் துறை வாரியான மானியக் கோரிக்கைகள் என இந்தச் சட்டமன்றக் கூட்டத்தொடர் குறைந்தது 40 நாட்களுக்கு மேல் நடைபெறும் எனத் தெரிகிறது. புதிய அரசின் செயல்பாடுகள் மற்றும் திட்டங்கள் எவ்வாறு இருக்கப் போகின்றன என்ற பெரும் எதிர்பார்ப்பு தற்போதைய அரசியல் வட்டாரத்திலும் பொதுமக்களிடையேயும் எழுந்துள்ளது.
