திருநறையூர் இராமநாத சுவாமி கோயில்: சனி பகவானுக்கு கோலாகலமாக நடைபெற்ற திருக்கல்யாண வைபவம்
தஞ்சாவூர்: தஞ்சை மாவட்டம் நாச்சியார்கோயில் அருகே அமைந்துள்ள வரலாற்றுச் சிறப்புமிக்க திருநறையூர் இராமநாத சுவாமி கோயிலில், சனி பகவானுக்கு திருக்கல்யாண வைபவம் வெகு சிறப்பாக நடைபெற்றது. இக்கோயிலில் சனி பகவான் தனது மனைவியர்களான மந்தா தேவி, ஜேஷ்டாதேவி மற்றும் புதல்வர்களான மாந்தி, குளிகன் ஆகியோருடன் குடும்ப சமேதராக எழுந்தருளி பக்தர்களுக்கு அருள்பாலிப்பது தனிச்சிறப்பாகும்.
தற்போது நடைபெற்று வரும் சனிப்பெயர்ச்சி விழாவையொட்டி, சனி பகவானுக்கு விசேஷ திருக்கல்யாண உற்சவம் நடத்தப்பட்டது. மங்கள வாத்தியங்கள் முழங்க நடைபெற்ற இந்த வைபவத்தைக் காணத் தஞ்சாவூர் மற்றும் சுற்றுவட்டாரப் பகுதிகளில் இருந்து ஆயிரக்கணக்கான பக்தர்கள் கோயிலில் திரண்டனர். திருக்கல்யாணத்தைத் தொடர்ந்து சுவாமிக்கும் அம்மனுக்கும் மகா தீபாராதனை நடைபெற்றது. இதில் பங்கேற்ற ஏராளமான பக்தர்கள் நீண்ட வரிசையில் நின்று சுவாமி தரிசனம் செய்தனர்.
