வளைகுடா போர் எதிரொலி: ஆனைமலை பகுதியில் தென்னை நார் தொழில் முடக்கம் – உற்பத்தியாளர்கள் கவலை!
வளைகுடா நாடுகளில் நிலவி வரும் தீவிரமான போர் பதற்றங்கள் காரணமாக, கோவை மாவட்டத்தின் முக்கியத் தொழில்களில் ஒன்றான தென்னை நார் தொழில் பெரும் சரிவைச் சந்தித்துள்ளது. குறிப்பாக, ஆனைமலை மற்றும் பொள்ளாச்சி சுற்றுவட்டாரப் பகுதிகளில் செயல்பட்டு வரும் 500-க்கும் மேற்பட்ட தென்னை நார் தொழிற்சாலைகள் இந்தச் சூழலால் நேரடியாகப் பாதிக்கப்பட்டுள்ளன.
இந்தப் பகுதிகளில் உற்பத்தி செய்யப்படும் உயர்தர தென்னை நார் மற்றும் அது சார்ந்த பொருட்கள் பெருமளவில் வளைகுடா நாடுகளுக்கே ஏற்றுமதி செய்யப்படுகின்றன. தற்போது அங்கு நிலவும் போர்ச் சூழல், போக்குவரத்துத் தடைகள் மற்றும் பொருளாதார நெருக்கடி காரணமாக ஏற்றுமதி ஆர்டர்கள் கடுமையாகக் குறைந்துள்ளன. இதன் விளைவாக, தென்னை நார் உற்பத்தி முடங்கும் நிலைக்குத் தள்ளப்பட்டுள்ளதாக உற்பத்தியாளர்கள் வேதனை தெரிவித்துள்ளனர். தொழிலாளர்கள் வாழ்வாதாரத்தை இழக்கும் அபாயம் ஏற்பட்டுள்ளதால், இப்பிரச்சினையில் அரசு உரிய கவனம் செலுத்த வேண்டும் என்ற கோரிக்கையும் எழுந்துள்ளது.
