920 அடி உயர கோபுரத்தில் மோதிய ராட்சத பலூன்: இரண்டு பேர் அதிர்ஷ்டவசமாக மீட்பு!
டெக்சாஸ்: அமெரிக்காவின் டெக்சாஸ் மாகாணத்தில் கட்டுப்பாட்டை இழந்த வெப்பக் காற்று பலூன் (Hot Air Balloon), சுமார் 920 அடி உயரமுள்ள ராட்சத தகவல் தொடர்பு கோபுரத்தில் மோதி சிக்கிய நிலையில், அதிலிருந்த இரண்டு பேர் காயமின்றி பத்திரமாக மீட்கப்பட்டனர். வடக்கு கிரெக் கவுண்டி பகுதியில் உள்ள மாநில நெடுஞ்சாலை சந்திப்பு அருகே பறந்து கொண்டிருந்த இந்த பலூன், எதிர்பாராத விதமாக அங்குள்ள செல்போன் கோபுரத்தின் மீது மோதியது. பலூனின் கூடை கோபுரத்தின் மிக உயரமான பகுதியில் சிக்கிக் கொண்டதால், அதிலிருந்தவர்களின் உயிருக்கு ஆபத்தான சூழல் உருவானது.
தகவலறிந்து சம்பவ இடத்திற்கு விரைந்த லாங்வியூ தீயணைப்புத் துறை மற்றும் மீட்புக் குழுவினர், கோபுரத்தின் உயரத்தில் சிக்கியிருந்த பலூனை மீட்கும் சவாலான பணியில் ஈடுபட்டனர். சுமார் 920 அடி உயரத்தில் பலூன் ஊசலாடிக் கொண்டிருந்த போதிலும், தீயணைப்பு வீரர்கள் துரிதமாகவும் லாவகமாகவும் செயல்பட்டு பலூனில் இருந்த இரண்டு பேரையும் பாதுகாப்பாகக் கீழே இறக்கினர். இந்த விபத்தில் யாருக்கும் பெரிய அளவில் காயங்கள் ஏற்படவில்லை என்பது குறிப்பிடத்தக்கது.
