ஈரானின் அடுத்த அதிகாரம்: யார் இந்த அலி லாரிஜானி? கமேனியின் வாரிசாக உருவெடுக்கிறாரா ‘ராஜதந்திர மூளை’?
தெஹ்ரான்: இஸ்ரேல் மற்றும் அமெரிக்காவின் கூட்டு ராணுவ நடவடிக்கைகளால் ஈரான் கடுமையான நெருக்கடியைச் சந்தித்து வரும் நிலையில், அந்த நாட்டின் மிக உயரிய அதிகாரமான ‘உச்ச தலைவர்’ (Supreme Leader) பதவிக்கு அலி லாரிஜானி நியமிக்கப்பட அதிக வாய்ப்புள்ளதாகத் தகவல்கள் வெளியாகியுள்ளன. தற்போதைய உச்ச தலைவர் அயதுல்லா அலி கமேனிக்கு (81) பிறகு, ஈரானை வழிநடத்தப்போகும் அந்த ‘வாரிசு’ யார் என்ற உலக நாடுகளின் எதிர்பார்ப்பிற்கு லாரிஜானி விடையாகத் தெரிந்துள்ளார்.
யார் இந்த அலி லாரிஜானி?
67 வயதான அலி லாரிஜானி, ஈரானின் அரசியல் மற்றும் ராணுவக் கட்டமைப்பில் மிக முக்கியமானவர்.
- பின்னணி: இஸ்லாமிய புரட்சிகர காவல்படையின் (IRGC) நிறுவன உறுப்பினர்களில் ஒருவர்.
- அனுபவம்: 2008 முதல் 2020 வரை சுமார் 12 ஆண்டுகள் ஈரான் நாடாளுமன்றத்தின் சபாநாயகராகப் பணியாற்றியவர்.
- தற்போதைய பதவி: கமேனியின் முதன்மை ஆலோசகர் மற்றும் உச்ச தேசிய பாதுகாப்பு கவுன்சிலின் செயலாளர்.
மதகுரு அல்லாத ஒருவருக்கு அங்கீகாரமா?
ஈரானின் மரபுப்படி உச்ச தலைவர் பதவிக்கு ஒரு மதகுருவே நியமிக்கப்படுவார். ஆனால், லாரிஜானி ஒரு மதகுரு இல்லை என்றாலும், அவரது அபரிமிதமான நாட்டுப்பற்று மற்றும் கமேனிக்கு அவர் மீதிருக்கும் அசைக்க முடியாத நம்பிக்கையாலும் இந்த அங்கீகாரம் அவருக்கு வழங்கப்படலாம் எனக் கூறப்படுகிறது. குறிப்பாக, அமெரிக்கத் தூதர் ஸ்டீவ் விட்காஃப் உடன் பேச்சுவார்த்தை நடத்த அதிபர் மசூர் பெஷேஷ்கியனே இவருக்கு முழு அதிகாரம் வழங்கியிருந்தது இவரது செல்வாக்கிற்குச் சான்றாகும்.
சர்வதேசத் தொடர்புகளும் அணு ஆயுத நிலைப்பாடும்:
சீனாவுடனான ஈரானின் முக்கிய ஒப்பந்தங்களுக்குப் பின்னால் இருந்த ‘மூளை’ லாரிஜானிதான். ரஷ்ய அதிபர் புதினுடன் நெருக்கமான உறவைக் கொண்டுள்ள இவர், இஸ்ரேலுக்கு எதிரான நடவடிக்கைகள் வெறும் ஆக்ரோஷமாக மட்டும் இல்லாமல் ‘அறிவுப்பூர்வமாக’ இருக்க வேண்டும் என்பதில் உறுதியாக இருப்பவர். “அமெரிக்கக் கூட்டணி நாடுகள் நம் மீது தாக்குதல் நடத்தினால், அணு ஆயுதம் தயாரிப்பதைத் தவிர வேறு வழியில்லை” என்பது இவரது அதிரடி நிலைப்பாடாக உள்ளது.
கமேனியின் திட்டம்:
அமெரிக்க மற்றும் இஸ்ரேலிய படைகள் கமேனியைத் தங்களின் முதல் இலக்காக வைத்துள்ள சூழலில், இஸ்லாமிய குடியரசு நிலைத்திருக்க வேண்டும் என்பதற்காகத் தனது அரசியல் வாரிசை முன்னரே கமேனி இறுதி செய்துள்ளதாகத் தெரிகிறது. ஈரானின் உள்நாட்டுக் கொள்கை முதல் உலக நாடுகளுடனான உறவு வரை அனைத்தையும் தீர்மானிக்கும் இந்த ‘வானளாவிய அதிகாரம்’ கொண்ட பதவிக்கு லாரிஜானி நியமிக்கப்படுவது குறித்த அதிகாரப்பூர்வ அறிவிப்பு விரைவில் வெளியாகலாம் என எதிர்பார்க்கப்படுகிறது.
