பவானிசாகர் அணையிலிருந்து கீழ்பவானி கால்வாய்க்கு நீர் விடுப்பு
பவானிசாகர் அணையில் இருந்து புன்செய் பாசன தேவைக்காக கீழ்பவானி கால்வாயில் தண்ணீர் திறந்துவிடப்பட்டுள்ளது.
ஈரோடு மாவட்டத்தில் உள்ள பவானிசாகர் அணையிலிருந்து, இரண்டாம் போக புன்செய் பாசனத்திற்காக கீழ்பவானி திட்டத்தின் பிரதான கால்வாயில் நீர் வெளியேற்றப்படும் என அரசால் முன்பே அறிவிக்கப்பட்டிருந்தது.
அந்த அறிவிப்பின் அடிப்படையில், கீழ்பவானி பிரதான கால்வாயில் ஒற்றை எண் மதகுகள் வழியாகவும், சென்னசமுத்திரம் பகிர்மான கால்வாயில் இரட்டை எண் மதகுகள் மூலமாகவும் பாசன நிலங்களுக்கு வினாடிக்கு 100 கன அடி அளவில் நீர் விடப்பட்டுள்ளது.
இன்று முதல் தொடர்ந்து 111 நாட்கள் நீர் திறப்பு நடைபெறும் என்றும், காலப்போக்கில் நீரளவு படிப்படியாக உயர்த்தப்பட்டு வினாடிக்கு 2,000 கன அடியாக அதிகரிக்கப்படும் என்றும் அதிகாரிகள் தெரிவித்துள்ளனர்.
இந்த நீர்விடுப்பின் மூலம் ஈரோடு, திருப்பூர் மற்றும் கரூர் மாவட்டங்களில் உள்ள மொத்தம் 1 லட்சத்து 3 ஆயிரத்து 500 ஏக்கர் விவசாய நிலங்கள் பாசன வசதி பெறும் எனவும் கூறப்பட்டுள்ளது.
