தமிழக விவசாயிகளின் இயற்கைச் சாகுபடி பாராட்டத்தக்கது
தமிழகத்தைச் சேர்ந்த உழவர்களின் இயற்கை வேளாண்மை நடைமுறைகள் அனைவரையும் கவர்கின்றன என்று பிரதமர் நரேந்திர மோடி பெருமையுடன் குறிப்பிட்டுள்ளார்.
லிங்க்ட்இன் பக்கத்தில் அவர் வெளியிட்டுள்ள குறிப்பில், கடந்த நவம்பர் 19ஆம் தேதி கோயம்புத்தூரில் நடந்த தென்னிந்திய இயற்கை வேளாண்மை மாநாட்டில் கலந்துகொண்ட பல்வேறு துறைகளிலிருந்து வந்த விவசாயிகளின் பங்களிப்பு தன்னை ஆச்சரியப்படுத்தியதாக கூறியுள்ளார்.
அத்துடன், விஞ்ஞானிகள், முதல் தலைமுறை பட்டதாரிகள், உயர் சம்பளப் பணிகளை விட்டு வேளாண்மைத் துறைக்குத் திரும்பியவர்கள் உள்ளிட்ட பலரையும் அவர் சந்தித்ததாகவும் தெரிவித்துள்ளார்.
தமிழக விவசாயிகள் இயற்கை வேளாண்மையில் காட்டும் அர்ப்பணிப்பு விதிவிலக்கானது என மோடி பாராட்டியுள்ளார்.
ஒரு விவசாயி 10 ஏக்கரில் வாழை, தென்னை, பப்பாளி, மிளகு, மஞ்சள் போன்ற பல்வேறு பயிர்களை இணைந்து வளர்த்துவருகிறார் என்றும் அவர் குறிப்பிட்டுள்ளார்.
கடந்த சில ஆண்டுகளாக ரசாயன உரங்களும் பூச்சிக்கொல்லிகளும் அதிகம் பயன்படுத்தப்பட்டதால் மண்ணின் ஆரோக்கியம், ஈரநிலை குறைந்துவிட்டதாகவும் அவர் சுட்டிக்காட்டியுள்ளார்.
பருவநிலை மாற்றம் மற்றும் திடீர் காலநிலை சவால்களுக்கு எதிராக பயிர்களை வலுவாக்கும் திறன் இயற்கை வேளாண்மைக்கு உண்டு என்பதையும், தேசிய இயற்கை வேளாண்மை முயற்சியின் மூலம் நாடு முழுவதும் உள்ள விவசாயிகள் இதில் இணைவதற்கு அழைப்பு விடுப்பதாகவும் அவர் தெரிவித்துள்ளார்.
நமது பாரம்பரிய அறிவும், அறிவியல் ஆதாரமும், அரசின் ஊக்கமும் ஒன்றிணைந்தால் இயற்கை வேளாண்மை எதிர்காலத்தில் ஒரு பெரிய மாற்றத்தை ஏற்படுத்தும் சக்தியாக வளரும் என்று பிரதமர் மோடி உறுதியாக கூறியுள்ளார்.
