இந்திய உணவு பாதுகாப்பு மற்றும் தர நிர்ணய ஆணையம் (FSSAI) அனைத்து உணவுத் தயாரிப்பு நிறுவனங்களுக்கும் ‘ORS’ என்ற லேபிளை பயன்படுத்துவதை உடனடியாக நிறுத்துமாறு உத்தரவிட்டுள்ளது. உண்மையில் ORS என்பதும், ORS இல்லாதது என்பதும் என்ன என்பதை விளக்கும் செய்தி தொகுப்பு இதோ.
உலக சுகாதார அமைப்பு (WHO) மற்றும் ஐக்கிய நாடுகள் குழந்தைகள் நிதியமைப்பு (UNICEF) உருவாக்கிய Oral Rehydration Solution (ORS) என்பது, வயிற்றுப்போக்கு, கடுமையான வாந்தி மற்றும் வெப்பத்தால் ஏற்படும் நீர்சத்து குறைவை சரிசெய்யும் முக்கிய உயிர்காக்கும் சிகிச்சை ஆகும். உலகளவில் மில்லியன் கணக்கான குழந்தைகள் ORS மூலம் உயிரிழப்பிலிருந்து காப்பாற்றப்பட்டுள்ளதாக தகவல்கள் தெரிவிக்கின்றன.
இந்தியாவில் பழச்சாறு, சர்க்கரை பானங்கள், எலக்ட்ரோலைட் பானங்கள், எனர்ஜி பானங்கள் போன்ற பல பானங்கள் ‘ORS’ லேபிளுடன் சந்தையில் விற்கப்பட்டு வந்தன. ஆனால், சர்க்கரை சேர்க்கப்பட்ட பானங்களில் ORS தரம் இல்லாததால், சிறுவர்கள் இதனை குடித்தால் உயிருக்கு ஆபத்தாக இருக்க முடியும்.
உலக சுகாதார அமைப்பின் வழிகாட்டுதலின்படி, ஒரு லிட்டர் ORS-ல்:
- 2.6 கிராம் சோடியம் குளோரைடு
- 1.5 கிராம் பொட்டாசியம் குளோரைடு
- 2.9 கிராம் சோடியம் சிட்ரேட்
- 13.5 கிராம் டெக்ஸ்ட்ரோஸ்
இந்த அளவுகளில் இருக்க வேண்டும். ஆனால் பல சர்க்கரை பானங்களில் ஒரு லிட்டருக்கு 120 கிராம் சர்க்கரை உள்ளது, எலக்ட்ரோலைட்ஸ் அளவும் குறைவாக உள்ளது.
டெலுங்கானாவின் டாக்டர் சிவரஞ்சனி சந்தோஷ் கடந்த 10 ஆண்டுகளாக சர்க்கரை பானங்களில் ORS லேபிள் பயன்படுத்துவதை எதிர்த்து சட்ட ரீதியாக போராடி வருகிறார். கடந்த 2022-ல் தெலுங்கானா உயர் நீதிமன்றத்தில் வழக்கு தொடரப்பட்டது. அதன் பின்னர், மத்திய சுகாதார அமைச்சகம் நடவடிக்கை எடுக்குமாறு கேட்டுக்கொண்டது.
இதன் அடிப்படையில், 2025 அக்டோபர் 14-ல் FSSAI அனைத்து ORS அனுமதிகளையும் ரத்து செய்தது. ORS தரமில்லாத எந்த உணவுப் பொருளையும் ORS என விற்கக் கூடாது என்று உத்தரவிட்டது.
அதன்பின், நவம்பர் 20-ல் உணவுப் பாதுகாப்பு சட்டத்தின் கீழ், சில்லறை கடைகள் மற்றும் மின் வணிக தளங்களில் இருந்து ORS தரமில்லாத, ஆனால் ORS லேபிளுடன் விற்பனை செய்யப்படும் பானங்களை உடனடியாக அகற்றும் உத்தரவு வழங்கப்பட்டது.
இந்தியாவில் அனைத்து மாநில உணவு பாதுகாப்பு அதிகாரிகள், ORS லேபிளை தவறாக பயன்படுத்தும் தயாரிப்புகளை கண்டறிந்து உடனடியாக அகற்றுவது, மற்றும் நடவடிக்கைகள் குறித்த அறிக்கையை சமர்ப்பிப்பது கட்டாயமாக அறிவிக்கப்பட்டுள்ளது. மக்களுக்கு, ORS வாங்கும் முன் உலக சுகாதார தர அளவுகளுக்கு ஏற்ப உள்ளது என்பதை உறுதி செய்யவும் அல்லது மருந்தாளரிடம் வாங்கவும் அறிவுறுத்தப்பட்டுள்ளது.
