டெல்லியில் நாளை முதல் இரண்டு நாட்கள் நடைபெற உள்ள போராட்டத்தில் கலந்துகொள்ள திருச்சியைச் சேர்ந்த 200-க்கும் மேற்பட்ட விவசாயிகள் நேற்று ரயிலில் பயணம் தொடங்கினர்.
தேசிய மயமாக்கப்பட்ட வங்கிகளில் விவசாயிகள் பெற்றுள்ள கடன்களை தள்ளுபடி செய்தல், விவசாய குடும்பங்களைச் சேர்ந்த மாணவர்களின் கல்விக் கடன்களை ரத்து செய்தல், மேகேதாட்டு அணை கட்டும் முயற்சியை உடனடியாக நிறுத்துதல் உள்ளிட்ட பல்வேறு கோரிக்கைகளை வலியுறுத்த இந்தப் போராட்டம் நடைபெற உள்ளது.
மேலும், விவசாயிகளின் உற்பத்திகளுக்கு இருமடங்கு லாபம் தரும் விலையில் ஆதரவு விலை நிர்ணயம், 60 வயதிற்கு மேற்பட்ட விவசாயிகளுக்கு மாதம் ரூ.5,000 ஓய்வூதியம் வழங்குதல் போன்ற கோரிக்கைகளும் முன்வைக்கப்படுகின்றன.
இதனை முன்னிட்டு, தேசிய தென்னிந்திய நதிகள் இணைப்பு விவசாயிகள் சங்க மாநிலத் தலைவர் அய்யாக்கண்ணு தலைமையில் விவசாயிகள் திருச்சி ஜங்ஷன் ரயில் நிலையத்தில் இருந்து வைகை விரைவு ரயில் மூலம் சென்னைக்கு புறப்பட்டனர். பின்னர் அங்கிருந்து டெல்லி நோக்கி செல்வதற்கான ஏற்பாடுகள் செய்யப்பட்டுள்ளன.
திருச்சியில் நடந்த அனுப்பி வைக்கும் நிகழ்ச்சியில் சங்க மாநிலச் செயலாளர் மேகராஜன் உள்ளிட்டோர் கலந்து கொண்டனர்.
