வங்கதேசத்தின் முன்னாள் பிரதமர் ஷேக் ஹசீனாவுக்கு மரண தண்டனை விதித்து அந்நாட்டின் சர்வதேச குற்றவியல் தீர்ப்பாயம் முக்கிய தீர்ப்பை அறிவித்துள்ளது.
1971-ஆம் ஆண்டில் பாகிஸ்தானிலிருந்து பிரிந்து வங்கதேசம் சுதந்திர நாடாக ஆனது. அந்த போர் காலத்தில் உயிரிழந்த சுதந்திரப் போராட்ட வீரர்களின் குடும்பங்களுக்கு அடுத்தபடியாக 30% இடஒதுக்கீடு வழங்கப்பட்டது. இந்த ஒதுக்கீட்டை எதிர்த்து மாணவர்கள் 2024 ஜூன்–ஜூலையில் பல்வேறு போராட்டங்களில் ஈடுபட்டனர்.
போராட்டம் தீவிரமாக சிலந்த, அப்போது பிரதமராக இருந்த ஷேக் ஹசீனா, காவல்துறைக்கு விரைவான நடவடிக்கை மேற்கொள்ள உத்தரவிட்டதாக குற்றம் சாட்டப்பட்டுள்ளது. போலீஸ் தடியடி, துப்பாக்கிச்சூடு ஆகியவற்றில் 1,400-க்கும் மேற்பட்ட மாணவர்கள் உயிரிழந்தனர்; மேலும் 25,000 பேர் காயமடைந்தனர்.
2024 ஆகஸ்ட் மாதத்தில் மாணவர் போராட்டம் தலைநகர் டாக்காவில் உச்சத்தை எட்டியது. அவர்கள் நாடாளுமன்ற மாளிகை, பிரதமர் இல்லம் உள்ளிட்ட முக்கிய இடங்களை முற்றுகையிட்டனர். இதனால் ஏற்பட்ட பரபரப்பில், 2024 ஆகஸ்ட் 5-ஆம் தேதி ஷேக் ஹசீனா வங்கதேசத்தை விட்டு வெளியேறி இந்தியாவில் தஞ்சம் அடைந்தார். தற்போது முகமது யூனுஸ் தலைமையிலான இடைக்கால அரசு ஆட்சி நடத்துகிறது.
இந்த பின்னணியில், மாணவர்களுக்கு எதிராக நடந்த வன்முறைகள் தொடர்பாக சர்வதேச குற்றவியல் தீர்ப்பாயம் விசாரணையைத் தொடங்கியது.
ஷேக் ஹசீனாவுக்கு சுமத்தப்பட்ட குற்றச்சாட்டுகள்
ஷேக் ஹசீனாவுக்கு 5 முக்கிய குற்றச்சாட்டுகள் சுமத்தப்பட்டன:
- மாணவர்களை கொலை செய்ய நேரடி உத்தரவு
- வன்முறையைத் தூண்டும் பேச்சு
- ஆதாரங்களை அழித்தல்
- மாணவர் சங்க தலைவரை கொலை செய்ய உத்தரவு
- டாக்காவில் 6 மாணவர்கள் படுகொலை செய்யப்பட்ட சம்பவத்தில் தொடர்பு
ஒராண்டிற்கும் மேல் நடைபெற்ற விசாரணைக்குப் பிறகு, தீர்ப்பாயம் 453 பக்கங்களிலான தீர்ப்பை வழங்கியது.
இதன்படி —
- குற்றச்சாட்டுகள் 1, 2, 3 நிரூபிக்கப்பட்டுள்ளதாக கூறப்பட்டு, ஷேக் ஹசீனாவுக்கு மரண தண்டனை அறிவிக்கப்பட்டது.
- முன்னாள் உள்துறை அமைச்சர் அசாதுஸ்மான் கானுக்கும் அதே தண்டனை வழங்கப்பட்டது.
- முன்னாள் காவல்துறைத் தலைவர் சவுத்ரி அப்துல்லா அல் மமூனுக்கு, அரசு சார்பில் சாட்சி அளித்ததற்காக 5 ஆண்டுகள் சிறை தண்டனை வழங்கப்பட்டது.
ஹசீனா மற்றும் அசாதுஸ்மான் கான் இருவரும் 30 நாட்களுக்குள் நேரடியாக தீர்ப்பாயத்தில் மேல்முறையீடு செய்யலாம் எனவும் கூறப்பட்டுள்ளது.
வங்கதேசத்தின் பதில்: இந்தியாவிடம் ஒப்படைப்பு கோரிக்கை
வங்கதேச அட்டர்னி ஜெனரல் தெரிவித்ததாவது:
இருவரும் தற்போது இந்தியாவில் தங்கியிருப்பதால், அவர்களை கைது செய்வதற்கான சட்ட நடவடிக்கைகள் எடுக்கப்பட உள்ளன. மேலும் அவர்களின் சொத்துகள் அனைத்தும் பறிமுதல் செய்யப்பட வேண்டும் என்று தீர்ப்பாயம் உத்தரவிட்டுள்ளது.
வங்கதேச வெளியுறவுத்துறை, இந்திய அரசு இந்த இருவரையும் நாடு கடத்த வேண்டும் என்று வலியுறுத்தியுள்ளது.
இந்தியா ஒப்படைக்குமா? — நிபுணர்களின் கருத்து
சட்ட நிபுணர்கள் கூறுவதாவது:
- ஷேக் ஹசீனா இந்தியாவின் நெருங்கிய கூட்டாளர்;
- இந்தியா அவரை நாடு கடத்த ஒப்புக்கொள்ளுவது அரிது.
- இந்தியா மறுக்கும்எனில், வங்கதேசம் இன்டர்போல் உதவி கோரும் வாய்ப்பு உள்ளது.
- அது சாத்தியமாகாத நிலையில், ஐ.நா. முன் முறையிடும் வாய்ப்பு உள்ளது.
ஆனால் சர்வதேச அரங்கில் இந்தியா வலுவான செல்வாக்கு பெற்றிருப்பதால், அந்த வழியும் வெற்றியடைவது சாத்தியமில்லை என்று நிபுணர்கள் கருத்து தெரிவிக்கிறார்கள்.
‘பாரபட்ச தீர்ப்பு’ — ஷேக் ஹசீனாவின் பதில்
தீர்ப்புக்கு எதிராக வெளியிட்ட அறிக்கையில் ஹசீனா கூறியதாவது:
- மனித உரிமை மீறல்களில் நான் ஈடுபடவில்லை, என் ஆட்சியில் உரிமைகள் காக்கப்பட்டன.
- 10 லட்ச ரோஹிங்கியர்களுக்கு நான் மனிதாபிமான அடைக்கலம் கொடுத்தேன்.
- தற்போதைய தீர்ப்பு அரசியல் பழிவாங்கும் நோக்கத்தில் வழங்கப்பட்டுள்ளது.
- முகமது யூனுஸ் அரசு சட்டபூர்வமான அரசு அல்ல; அதன் கீழ் இயங்கும் தீர்ப்பாயமும் செல்லாது.
- என் கட்சியான அவாமி லீக்கை பலவீனப்படுத்த சதி நடைபெற்று வருகிறது.
- தீர்ப்பாயத்தில் எனது சார்பில் வழக்கறிஞர் ஆஜராக அனுமதிக்கப்படவில்லை.
- இந்த குற்றச்சாட்டை சர்வதேச நீதிமன்றத்தில் விசாரிக்கலாம்; வங்கதேச அரசு அதற்கு தயாரா?
- மக்கள் ஆதரவுடன் நாடை மீட்போம்.
