தமிழகத்தில் ஆணவக் கொலைகளைத் தடுக்கும் வகையில் பரிந்துரைகள் அளிக்க முன்னாள் உயர் நீதிமன்ற நீதிபதி கே. என். பாஷா தலைமையில் ஆணையம் அமைக்கப்பட்டுள்ளதாக தமிழக அரசு அரசாணை வெளியிட்டுள்ளது.
முதல்வர் ஸ்டாலின் கடந்த அக்டோபர் 17-ம் தேதி சட்டப்பேரவையில் இத்தகைய ஆணையம் அமைக்கப்படும் என்று அறிவித்திருந்தார். அதனை செயல்படுத்தும் வகையில் தற்போது அதிகாரப்பூர்வமாக ஆணையம் உருவாக்கப்பட்டுள்ளது.
ஆணைய அமைப்பு:
- தலைவர்: முன்னாள் நீதிபதி கே. என். பாஷா
- உறுப்பினர்கள்: ஓய்வுபெற்ற ஐஏஎஸ் அதிகாரி வி. பழனிகுமார், ஓய்வுபெற்ற ஐபிஎஸ் அதிகாரி எஸ். ராமநாதன்
ஆணையத்தின் பணிகள்:
- அரசியல் கட்சிகள், சட்ட வல்லுநர்கள், சமூக ஆர்வலர்கள் மற்றும் பாதிக்கப்பட்டவர்களின் கருத்துகளை சேகரித்தல்
- ஆணவக் கொலைகளுக்கான சமூக காரணிகளை ஆய்வு செய்தல்
- புதிய சட்டங்களை உருவாக்கவும், நடைமுறைகளில் திருத்தங்களைச் செய்யவும் பரிந்துரை செய்வது
- எதிர்காலத்தில் இத்தகைய சம்பவங்களைத் தடுக்கும் விழிப்புணர்வு நடவடிக்கைகள் பற்றிய செயல்திட்டம் முன்மொழிவது
ஆணையம் தனது ஆய்வுகளை முடித்து 3 மாதங்களுக்குள் முழுமையான அறிக்கையை அரசுக்கு சமர்ப்பிக்க வேண்டும் என்றும் அரசாணையில் குறிப்பிடப்பட்டுள்ளது.
