வாக்காளர் பட்டியல் சிறப்பு திருத்தம் நிற்காவிட்டால் உச்சநீதிமன்றம்: அனைத்துக் கட்சி கூட்டத் தீர்மானம்
தமிழகத்தில் நடைபெற்று வரும் வாக்காளர் பட்டியல் சிறப்பு தீவிர திருத்த (SIR) பணியை உடனடியாக நிறுத்த வேண்டும், இல்லை எனில் உச்சநீதிமன்றத்தில் வழக்கு தொடரப்படும் என அனைத்துக் கட்சி கூட்டத்தில் முடிவு செய்யப்பட்டது. இக்கூட்டம் முதல்வர் மு.க.ஸ்டாலின் தலைமையில் நடந்தது.
1951 முதல் 2004 வரை எட்டு முறை SIR பணி நடத்தப்பட்ட நிலையில், சுமார் 21 ஆண்டுகளுக்குப் பிறகு மீண்டும் இது தொடங்கப்பட்டுள்ளது. பிஹாரில் நடைபெற்ற இந்த செயல்முறையில் பல குறைகள் ஏற்பட்டதாக கூறப்பட்ட நிலையில், தமிழகத்திலும் புதுச்சேரி, கேரளா, மேற்கு வங்கம் உள்ளிட்ட 12 மாநிலங்களில் இப்பணி தொடங்கப்பட்டுள்ளது.
திமுக மற்றும் கூட்டணிக் கட்சிகள் இதற்கு கடும் எதிர்ப்பைத் தெரிவித்தன. பயிற்சி முடிந்த நிலையில் நவம்பர் 4 முதல் வீடு வீடாக ஆய்வு செய்யும் பணி தொடங்க இருந்தது.
கூட்டத்தில் நிறைவேற்றப்பட்ட தீர்மானத்தில்,
- மத்திய அரசின் அழுத்தத்தில் தேர்தல் ஆணையம் செயல்படுவதாக குற்றச்சாட்டு
- சிறுபான்மை மற்றும் எதிர்க்கட்சிகளின் வாக்குகளை நீக்க முயற்சி என கருத்து
- பிஹாரில் ஏற்பட்ட குறைகள் சரிபார்க்கப்படாமல் பிற மாநிலங்களில் பணியைத் தொடங்குவது ஏற்க முடியாதது
- இது ஜனநாயகத்தையும் மக்களின் வாக்குரிமையையும் பறிக்கும் நடவடிக்கை என கண்டனம்
நவம்பர்–டிசம்பர் மாதங்கள் வடகிழக்கு பருவமழை மற்றும் பண்டிகைக் காலம் என்பதால் சரியான கணக்கெடுப்பு நடைபெற முடியாது எனவும் குறிப்பிடப்பட்டது. மேலும், சட்டப்படி மத்திய அரசு அறிவிப்பு பிறகே திருத்தம் செய்யப்பட வேண்டும், தேர்தல் ஆணையம் தனியாக முடிவு எடுப்பது சட்டத்திற்கு எதிரானது என கூறப்பட்டது.
எனவே SIR பணியை நிறுத்தி, 2026 சட்டப்பேரவைத் தேர்தலுக்குப் பிறகு வெளிப்படையாகவும், சார்பில்லாமலும் இந்த செயல்முறை நடத்தப்பட வேண்டும் என கூறப்பட்டது. இல்லை எனில் அனைத்து கட்சிகளும் இணைந்து உச்சநீதிமன்றத்தில் மனு தாக்கல் செய்யப்படும் என தீர்மானிக்கப்பட்டது.
இந்தக் கூட்டத்தில் திமுக கூட்டணிக் கட்சிகளும், இதர கட்சிகளும் சேர்த்து 49 கட்சிகள் பங்கேற்றன. அதிமுக, பாஜக உள்ளிட்ட சில கட்சிகள் பங்கேற்கவில்லை.
