வைகை அணையிலிருந்து சிவகங்கை மாவட்ட பாசனத்துக்காக நீர் திறப்பு
தேனி மாவட்டத்தில் வடகிழக்கு பருவமழை காரணமாக கடந்த இரண்டு வாரங்களாக வைகை அணையில் நீர்மட்டம் குறிப்பிடத்தக்க அளவில் உயர்ந்தது. 71 அடி கொள்ளளவுள்ள அணை, அக்டோபர் 20 அன்று 69 அடியை எட்டியதைத் தொடர்ந்து, பாதுகாப்பு நடவடிக்கையாக உபரிநீர் வெளியேற்றம் தொடங்கப்பட்டது.
மூலவைகை மற்றும் முல்லைப்பெரியாறு நீர்வரத்து அதிகரிப்பதால் அணையின் நீர்மட்டம் 70 அடியை கடந்தது. இதையடுத்து ராமநாதபுரம், சிவகங்கை, மதுரை உள்ளிட்ட பூர்வீக பாசனப் பகுதிகளில் உள்ள கண்மாய்கள் நிரம்பும் வகையில் மொத்தம் 1,824 மில்லியன் கனஅடி நீர் திறக்க அரசு உத்தரவிட்டது.
அதன்படி,
- ராமநாதபுரம் மாவட்டத்திற்கு அக்டோபர் 27 முதல் 31 வரை 624 மில்லியன் கனஅடி நீர் வெளியிடப்பட்டது.
- இன்று (நவம்பர் 2) முதல் சிவகங்கை மாவட்டத்துக்கு 2,000 கனஅடி வீதம் நீர் திறக்கப்பட்டுள்ளது; நவம்பர் 6 வரை 772 மில்லியன் கனஅடி நீர் வழங்கப்படும்.
- பின்னர் நவம்பர் 8 முதல் 13 வரை மதுரை மாவட்டத்திற்கு 428 மில்லியன் கனஅடி நீர் வழங்க திட்டமிடப்பட்டுள்ளது.
இந்த நீர் திறப்பின் மூலம் மூன்று மாவட்டங்களிலுமே 1,36,109 ஏக்கர் பாசன நிலங்கள் பாசன வசதி பெறுகின்றன. இதனால் விவசாயிகள் மகிழ்ச்சி தெரிவித்துள்ளனர்.
தற்போது பாசனம் மற்றும் குடிநீர் தேவைகளுக்காக 3,449 கனஅடி நீர் வெளியேற்றப்பட்டு வருகிறது. எனவே குடியிருப்போர் ஆற்றுக்குள் இறங்காமல், பாதுகாப்பு விதிகளை பின்பற்ற வேண்டுமென நீர்வளத் துறை அதிகாரிகள் எச்சரிக்கை விடுத்துள்ளனர்.
