கும்பகோணம் அருகே மழையில் நனைந்து வீணான 1.5 லட்சம் நெல் மூட்டைகள்: விவசாயிகள் கடும் வேதனை!
தஞ்சாவூர்:
தமிழகத்தின் நெற்களஞ்சியமான தஞ்சை மாவட்டம் கும்பகோணம் மற்றும் அதன் சுற்றுவட்டாரப் பகுதிகளில், கடந்த சில மாதங்களாகப் பயிரிடப்பட்டு அறுவடை செய்யப்பட்ட நெல் மணிகள் அனைத்தும் பட்டீஸ்வரம் அருகே உள்ள தனியாருக்குச் சொந்தமான சேமிப்புக் கிடங்கு ஒன்றில் கொண்டு வந்து வைக்கப்பட்டன. அவ்வாறு கொண்டு வரப்பட்ட நெல் மூட்டைகளை உடனடியாக அரவைக்கு அனுப்பாமல், கடந்த பல மாதங்களாகப் பராமரிப்பின்றித் திறந்தவெளியிலேயே அடுக்கிக் வைக்கப்பட்டிருந்ததாகக் கூறப்படுகிறது.
கொட்டித்தீர்த்த கனமழையும், முளைத்த நெல் மணிகளும்
இந்த நிலையில், கும்பகோணம் மற்றும் அதன் சுற்றுப்புறப் பகுதிகளில் நேற்றிரவு திடீரெனக் கனமழை கொட்டித் தீர்த்தது. போதிய பாதுகாப்பு ஏற்பாடுகள் இல்லாமல் திறந்தவெளியில் வைக்கப்பட்டிருந்ததால், அங்குள்ள சுமார் ஒன்றரை லட்சம் நெல் மூட்டைகளும் மழ நீரில் முழுமையாக நனைந்து சேதமடைந்துள்ளன. மழையில் நீண்ட நேரம் ஊறியதன் காரணமாக நெல் மணிகள் அனைத்தும் தற்போது முளைக்கத் தொடங்கியுள்ளன. தங்களின் பல மாத உழைப்பு இப்படி வீணாகிப் போனதைக் கண்டு அப்பகுதி விவசாயிகள் மிகுந்த கவலையும் வேதனையும் அடைந்துள்ளனர்.
அமைச்சர் வினோத் நடவடிக்கை உறுதி
நெல் மூட்டைகள் வீணானது குறித்துத் தகவல் அறிந்ததும், இப்பிரச்சினை தொடர்பாக உரிய நடவடிக்கை எடுக்கப்படும் எனத் தமிழக அரசுத் தரப்பில் தெரிவிக்கப்பட்டுள்ளது. இது குறித்துப் பேசிய வேளாண்துறை அமைச்சர் வினோத் அவர்கள், மழையினால் சேதமடைந்த நெல் மணிகளைத் துறை சார்ந்த அதிகாரிகள் நேரில் சென்று உடனடியாக ஆய்வு செய்வார்கள் என்றும், அதனைத் தொடர்ந்து விவசாயிகளின் நலன் கருதி அடுத்தகட்ட நடவடிக்கைகள் விரைந்து எடுக்கப்படும் என்றும் உறுதி அளித்துள்ளார்.
