தமிழகத்தில் 40 RTO அலுவலகங்களில் லஞ்ச ஒழிப்புத்துறை அதிரடி சோதனை – ரூ.37 லட்சம் ரொக்கம், ஜி-பே பரிவர்த்தனைகள் பறிமுதல்!
சென்னை:
தமிழகம் முழுவதும் உள்ள 40 வட்டாரப் போக்குவரத்து (RTO) அலுவலகங்களில் லஞ்ச ஒழிப்புத்துறை அதிகாரிகள் நடத்திய அதிரடி சோதனையில், கணக்கில் வராத 37 லட்சத்து 81 ஆயிரம் ரூபாய் ரொக்கப் பணம் அதிரடியாகப் பறிமுதல் செய்யப்பட்டுள்ளது. புதிய ஓட்டுநர் உரிமம் வழங்குதல், வாகனப் பதிவு மற்றும் தகுதிச் சான்றிதழ் (FC) உள்ளிட்ட பல்வேறு சேவைகளுக்குப் பொதுமக்களிடமிருந்தும், இடைத்தரகர்களிடமிருந்தும் பெருமளவில் லஞ்சம் கைமாறுவதாக லஞ்ச ஒழிப்புத்துறைக்கு அடுத்தடுத்து ரகசியத் தகவல்கள் கிடைத்தன. அதன் அடிப்படையில், தமிழகத்தின் முக்கிய மாவட்டங்களில் உள்ள ஆர்.டி.ஓ அலுவலகங்களில் நுழைவாயில்களை மூடி, அதிகாரிகள் ஒரே நேரத்தில் இந்த அதிரடி சோதனையை (Surprise Raid) மேற்கொண்டனர்.
மாவட்ட வாரியாக முடக்கப்பட்ட கணக்கில் வராத பணம்:
இந்த அதிரடி வேட்டையின் ஒரு பகுதியாக, கோவை காந்திபுரத்தில் உள்ள மத்திய ஆர்.டி.ஓ அலுவலகத்தில் நுழைவாயில்கள் அனைத்தும் பூட்டப்பட்டு, வளாகத்தில் நிறுத்தப்பட்டிருந்த அதிகாரிகள், இடைத்தரகர்களின் கார்கள் மற்றும் வாகனங்களில் தீவிர சோதனை நடத்தப்பட்டது. இதேபோல், திருச்சி பிராட்டியூரில் உள்ள மேற்கு ஆர்.டி.ஓ அலுவலகத்திலும், திண்டுக்கல் மாவட்டம் பழனி ஆர்.டி.ஓ அலுவலகத்திலும் கதவுகளைப் பூட்டி அதிகாரிகள் தீவிர விசாரணை நடத்தினர். சேலம் மாவட்டம் கந்தம்பட்டி மேற்கு ஆர்.டி.ஓ அலுவலகத்தில் ஏடிஎஸ்பி கிருஷ்ணராஜ் தலைமையிலான குழுவினர் நடத்திய சோதனையில் கணக்கில் வராத 50 ஆயிரம் ரூபாயும், திருப்பூர் தெற்கு ஆர்.டி.ஓ அலுவலகத்தில் லஞ்ச ஒழிப்பு ஆய்வாளர் சசிலேகா தலைமையிலான போலீசார் நடத்திய சோதனையில் 1 லட்சத்திற்கும் அதிகமான ரொக்கப் பணமும் சிக்கின.
டிஜிட்டல் லஞ்சம் – அதிர்ச்சியில் அதிகாரிகள்:
தமிழகம் முழுவதும் நள்ளிரவு வரை நீடித்த இந்த அதிரடி சோதனையின் முடிவில், கணக்கில் வராத ரூ.37.81 லட்சம் ரொக்கம் மட்டுமின்றி, லஞ்சப் பணத்தை டிஜிட்டல் முறையில் வாங்கிய திடுக்கிடும் தகவலும் வெளிச்சத்திற்கு வந்துள்ளது. அதிகாரிகள் மற்றும் இடைத்தரகர்களின் மொபைல் எண்களை ஆய்வு செய்ததில், G-Pay (கூகுள் பே) உள்ளிட்ட ஆன்லைன் செயலிகள் மூலம் மட்டுமே சுமார் 5 லட்சத்து 95 ஆயிரம் ரூபாய் வரை லஞ்சப் பணப் பரிவர்த்தனை நடந்திருப்பதை லஞ்ச ஒழிப்புத்துறை போலீசார் கண்டுபிடித்துள்ளனர். இந்த முறைகேடு தொடர்பாகச் சம்பந்தப்பட்ட மோட்டார் வாகன ஆய்வாளர்கள் (MVI) மற்றும் ஊழியர்கள் மீது துறை ரீதியான நடவடிக்கை எடுக்கவும், வழக்குப்பதிவு செய்யவும் லஞ்ச ஒழிப்புத்துறை தீவிரமாக முடுக்கிவிட்டுள்ளது.
