சட்டசபையில் தவெக அரசை எதிர்கொள்வது எப்படி? தினமும் 5 மணி நேரம் தீவிரப் பயிற்சி மேற்கொண்டு வரும் எதிர்க்கட்சித் தலைவர் உதயநிதி!
தமிழக சட்டமன்றத்தின் இந்த ஆண்டிற்கான பட்ஜெட் கூட்டத்தொடர் வரும் ஜூன் 18-ஆம் தேதி தொடங்கவுள்ள நிலையில், அவையில் ஆளுங்கட்சியின் வாதங்களை எதிர்கொண்டு மக்கள் பிரச்சினைகளை வலுவாக முன்வைப்பதற்காக, எதிர்க்கட்சித் தலைவர் உதயநிதி ஸ்டாலின் தினமும் 5 மணி நேரம் சிறப்புப் பயிற்சி எடுத்து வருவதாகத் தி.மு.க தரப்பு வட்டாரங்களிலிருந்து அதிரடித் தகவல்கள் வெளியாகியுள்ளன. புதிய தவெக அரசின் முதல் பட்ஜெட் கூட்டத்தொடர் என்பதால் ஒட்டுமொத்தப் பொதுமக்களிடமும், அதேவேளையில் எதிர்க்கட்சித் தலைவராக உதயநிதி எதிர்கொள்ளும் முதல் முழுமையான கூட்டத்தொடர் என்பதால் தி.மு.க தொண்டர்கள் மத்தியிலும் இம்மாநாடு பெரும் எதிர்பார்ப்பை ஏற்படுத்தியுள்ளது. ஏற்கனவே நடைபெற்ற நம்பிக்கை வாக்கெடுப்பின் போது, எதிர்க்கட்சித் தலைவரின் கேள்விகளுக்கு நேரடிப் பதிலளிக்காமல் முதலமைச்சர் வீட்டிற்குச் சென்று அறிக்கை வெளியிட்டதாக எழுந்த விமர்சனங்களுக்கு முற்றுப்புள்ளி வைக்க இருதரப்பும் தற்போது தயாராகி வருகின்றன.
இதற்கிடையே, பட்ஜெட் கூட்டத்தொடரில் எதிர்க்கட்சிகளின் கேள்விகளுக்குத் துறை சார்ந்த புள்ளிவிவரங்களுடன் பதிலடி கொடுத்து அவர்களின் வாயை அடைப்பதற்காக முதலமைச்சர் விஜய் வியூகங்களை வகுத்து வரும் நிலையில், அதற்கு இணையாகத் தானும் களமிறங்க உதயநிதி திட்டமிட்டுள்ளார். மாநிலத்தின் தற்போதைய முக்கியப் பிரச்சினைகளான மேகதாது அணை விவகாரம், தொடரும் அறிவிக்கப்படாத மின்வெட்டு மற்றும் சட்டம் – ஒழுங்கு சீர்கேடுகள் குறித்துச் சட்டமன்றத்தில் எப்படிப் பேசுவது, ஆளுங்கட்சியை எவ்விதம் மடக்குவது என்பது குறித்து தி.மு.க-வின் முன்னாள் அமைச்சர்கள் மற்றும் ஓய்வுபெற்ற மூத்த அரசு அதிகாரிகள் அடங்கிய குழுவினர் உதயநிதிக்குத் தீவிரப் பயிற்சி அளித்து வருகின்றனர்.
இதற்காகத் தனது அன்றாடப் பணிகளுக்கு இடையே தினமும் 5 மணி நேரத்திற்கும் மேலாகப் பிரத்யேகமாக ஒதுக்கி, பட்ஜெட் உரைகள் மற்றும் துறை சார்ந்த கோப்புகளை உதயநிதி உற்று நோக்கித் தயார் செய்து வருவதாகத் தி.மு.க நிர்வாகிகள் பெருமிதத்துடன் தெரிவிக்கின்றனர். ஆளுங்கட்சி, எதிர்க்கட்சி என இருதரப்புமே பயிற்சிகளுடன் களம் காணப் போவதால், வரவிருக்கும் பட்ஜெட் கூட்டத்தொடர் அரசியல் அரங்கில் தற்போதே பெரும் பரபரப்பையும் விறுவிறுப்பையும் தொற்றிக்கொள்ளச் செய்துள்ளது.
