மியான்மரில் பயங்கர வெடி விபத்து: குழந்தைகள் உள்பட 45 பேர் பரிதாப பலி – 70-க்கும் மேற்பட்டோர் படுகாயம்!
இந்தியாவின் அண்டை நாடான மியான்மரில், நீண்டகாலமாக உள்நாட்டுப் போர் நீடித்து வரும் சூழலில், அந்நாட்டின் ஷஹன் மாகாணத்தில் உள்ள நாம்காம் நகரின் கிராமம் ஒன்றில் இன்று நிகழ்ந்த பயங்கர வெடி விபத்து அந்நாட்டு மக்களிடையே பெரும் அதிர்ச்சியை ஏற்படுத்தியுள்ளது. கிளர்ச்சியாளர்களின் கட்டுப்பாட்டில் உள்ள அப்பகுதியில், சுரங்கப் பணிகளுக்காக ஒரு வீட்டில் பதுக்கி வைக்கப்பட்டிருந்த வெடிமருந்துகள் எதிர்பாராதவிதமாகத் திடீரென வெடித்துச் சிதறியதே இந்தத் துயரத்திற்கு முதற்காரணமாகக் கூறப்படுகிறது.
இந்த பயங்கர வெடிச்சத்தத்தால் அப்பகுதியில் இருந்த வீடுகள் மற்றும் கட்டிடங்கள் பலம் இழந்து இடிந்து தரைமட்டமாகின. இடிபாடுகளில் சிக்கி, குழந்தைகள் உட்பட 45 அப்பாவி மக்கள் சம்பவ இடத்திலேயே பரிதாபமாக உயிரிழந்தனர். மேலும், இந்த விபத்தில் படுகாயமடைந்த 70-க்கும் மேற்பட்டோர் மீட்கப்பட்டு, அருகில் உள்ள மருத்துவமனைகளில் அவசரச் சிகிச்சைப் பிரிவில் அனுமதிக்கப்பட்டுள்ளனர். இந்தச் சம்பவம் குறித்து ராணுவம் தீவிர விசாரணை மேற்கொண்டு வருவதாக மியான்மர் ஊடகங்கள் செய்தி வெளியிட்டுள்ளன.
உள்நாட்டுச் சூழல்: ராணுவ ஆட்சி மற்றும் உள்நாட்டுப் போர் காரணமாக ஏற்கனவே பதற்றமான சூழலில் இருக்கும் மியான்மரில், இதுபோன்ற விபத்துகள் மக்கள் மத்தியில் மிகுந்த சோகத்தையும் அச்சத்தையும் உருவாக்கியுள்ளன.
