நிலவில் மனிதர்களைக் குடியேற்ற நிரந்தரத் தளம்: ₹1.70 லட்சம் கோடியில் மெகா திட்டத்தை அறிவித்தது நாசா!
வாஷிங்டன்:
விண்வெளித் துறையில் புதிய வரலாற்றுப் புரட்சியாக, நிலவில் மனிதர்கள் நிரந்தரமாகத் தங்கி ஆய்வு செய்வதற்கான பிரம்மாண்டமான மூன்று கட்டத் திட்டத்தை அமெரிக்க விண்வெளி ஆய்வு மையமான ‘நாசா’ (NASA) அதிகாரப்பூர்வமாக அறிவித்துள்ளது. சமீபத்தில் ஆர்ட்டெமிஸ்-2 (Artemis 2) திட்டத்தின் மூலம் நான்கு விண்வெளி வீரர்கள், சுமார் 54 ஆண்டுகளுக்குப் பிறகு முதல்முறையாக நிலவை மிக நெருக்கமாகச் சுற்றி வந்து சாதனை படைத்தனர். அதனைத் தொடர்ந்து, விண்வெளி வீரர்களின் அடுத்தகட்டப் பயணங்களுக்கு அடித்தளம் அமைக்கும் வகையில், நிலவின் மேற்பரப்பில் ரோவர்கள் (Rovers), அதிநவீன ட்ரோன்கள் (Drones) உள்ளிட்ட சகல வசதிகளுடன் கூடிய நிரந்தரத் தளம் (Moon Base) அமைக்கப்படவுள்ளது. இந்த மாபெரும் சர்வதேசத் திட்டத்திற்காக நாசா சுமார் 20 பில்லியன் டாலர் (இந்திய மதிப்பில் சுமார் ₹1.70 லட்சம் கோடி) நிதியைச் செலவிடத் திட்டமிட்டுள்ளது.
இந்த லட்சியத் திட்டத்தின் முதற்கட்டமாக, நடப்பு ஆண்டிலேயே மூன்று அதிநவீன விண்கலங்களை நிலவுக்கு அனுப்பி, அங்குள்ள தொழில்நுட்பக் கட்டமைப்புகள் மற்றும் உந்துவிசைச் செயல்பாடுகள் தீவிரமாகச் சோதிக்கப்படவுள்ளன. ப்ளூ ஆரிஜின் நிறுவனத்தின் ‘ப்ளூ மூன் மார்க் 1’ எண்டூரன்ஸ் தரையிறங்கி (Lander) உள்ளிட்ட நவீனக் கருவிகள் இந்த சோதனைகளில் பயன்படுத்தப்படவுள்ளன. 2028-ஆம் ஆண்டுக்குள் விண்வெளி வீரர்களை மீண்டும் வெற்றிகரமாக நிலவில் இறக்கி, அங்கு மனிதகுலத்தின் முதலாவது நிரந்தரப் புறக்காவல் நிலையத்தை (Outpost) உருவாக்குவதே இத்திட்டத்தின் இறுதி இலக்கு என்று நாசா நிர்வாகி ஜாரெட் ஐசக்மேன் தெரிவித்துள்ளார். நிலவின் தென் துருவத்தில் அமையவுள்ள இந்த ஆய்வுத் தளம், எதிர்காலத்தில் மனிதர்கள் செவ்வாய் கிரகத்திற்குப் பயணம் மேற்கொள்வதற்கான மிக முக்கியப் பயிற்சித் தளமாக விளங்கும் என உலக விண்வெளி ஆராய்ச்சியாளர்கள் பெரிதும் எதிர்பார்க்கின்றனர்.
