இபிஎஸ் உடன் வேலுமணி சந்திப்பு: சபாநாயகரிடம் மனுக்களைத் திரும்பப் பெற்று ‘ஒன்றிணைந்தது’ அதிமுக!
சென்னை:
அதிமுகவின் இருதரப்பும் முறைப்படி ஒன்றிணைந்ததைத் தொடர்ந்து, அக்கட்சியின் இடைக்காலப் பொதுச்செயலாளர் எடப்பாடி பழனிசாமியை முன்னாள் அமைச்சர் எஸ்.பி.வேலுமணி நேரில் சந்தித்துப் பேசினார். இந்த முக்கிய சந்திப்பை அடுத்து, சென்னை தலைமைச் செயலகத்தில் சபாநாயகர் ஜே.சி.டி.பிரபாகரை, எஸ்.பி.வேலுமணி தலைமையிலான அதிமுக எம்.எல்.ஏ-க்கள் நேரில் சந்தித்தனர். அப்போது, கடந்த சட்டப்பேரவைக் கூட்டத்தொடரில் நடந்த நம்பிக்கை வாக்கெடுப்பின் போது, கட்சி கொறடாவின் உத்தரவை மீறி செயல்பட்டதற்காக மன்னிப்பு கோரும் கடிதத்தை அவர்கள் சபாநாயகரிடம் முறைப்படி வழங்கினர். மேலும், இருதரப்பிலும் ஒருவருக்கொருவர் எதிராக நடவடிக்கை எடுக்கக் கோரி இதற்கு முன் அளிக்கப்பட்டிருந்த அனைத்துக் கடிதங்களையும் திரும்பப் பெறுவதாகச் சபாநாயகரிடம் தெரிவிக்கப்பட்டது.
இந்தச் சந்திப்பிற்குப் பின் செய்தியாளர்களிடம் பேசிய எஸ்.பி.வேலுமணி, “அதிமுகவில் இனி எந்தப் பிளவும் இல்லை; நாங்கள் அனைவரும் ஒற்றுமையாகச் செயல்பட்டு, கடந்த காலத் தோல்விகளுக்கான காரணங்களை ஆராய்ந்து சரிசெய்வோம்” என்று குறிப்பிட்டார். இதற்கிடையே, அதிமுகவின் இருதரப்பினரும் வழங்கிய புதிய மனுக்கள் மற்றும் கடிதங்கள் குறித்துப் பரிசீலனை செய்து, அதுகுறித்த இறுதி முடிவை நாளை அறிவிப்பதாகச் சபாநாயகர் ஜே.சி.டி. பிரபாகர் தெரிவித்துள்ளார். தமிழக அரசியல் களத்தில் அதிரடித் திருப்பமாக அமைந்துள்ள இந்த நிகழ்வு, அதிமுக தொண்டர்களிடையே உற்சாகத்தை ஏற்படுத்தியுள்ளது.
