உச்ச நீதிமன்ற நீதிபதிகளின் எண்ணிக்கை 38 ஆக உயர்வு: குடியரசுத் தலைவர் திரௌபதி முர்மு அதிரடி ஒப்புதல்!
புதுடெல்லி:
இந்திய உச்ச நீதிமன்ற நீதிபதிகளின் எண்ணிக்கையை தற்போதைய அளவிலிருந்து 38 ஆக உயர்த்துவதற்கான அவசரச் சட்டத்திற்கு குடியரசுத் தலைவர் திரௌபதி முர்மு அதிகாரப்பூர்வமாக ஒப்புதல் அளித்துள்ளார்.
உச்ச நீதிமன்றத்தில் நிலுவையில் உள்ள வழக்குகளை விரைந்து முடிக்க ஏதுவாக, தலைமை நீதிபதி உட்பட தற்போதுள்ள நீதிபதிகளின் எண்ணிக்கையை 34-ல் இருந்து 38 ஆக உயர்த்த பிரதமர் நரேந்திர மோடி தலைமையிலான மத்திய அமைச்சரவைக் குழு சமீபத்தில் கொள்கை அளவிலான முடிவை எடுத்து, அதற்கான முன்மொழிவை அனுப்பியிருந்தது. இந்த நிலையில், மத்திய அரசின் பரிந்துரையை ஏற்று குடியரசுத் தலைவர் திரௌபதி முர்மு இதற்கு தற்போது ஒப்புதல் வழங்கியுள்ளார்.
இது குறித்து மத்திய சட்ட அமைச்சர் அர்ஜுன் ராம் மேக்வால் தனது அதிகாரப்பூர்வ ‘எக்ஸ்’ (X) சமூக வலைதளப் பக்கத்தில் பதிவிட்டுள்ளதாவது:
“1956-ஆம் ஆண்டு உச்ச நீதிமன்ற நீதிபதிகள் எண்ணிக்கை சட்டத்தில் (The Supreme Court (Number of Judges) Act, 1956) திருத்தங்கள் மேற்கொள்ளப்பட்டு, நீதிபதிகளின் எண்ணிக்கையை 34-லிருந்து 38 ஆக உயர்த்துவதற்கான அவசரச் சட்டம் (Ordinance) பிறப்பிக்கப்பட்டுள்ளது. இந்த அவசரத் திருத்தச் சட்டத்திற்கு மாண்புமிகு குடியரசுத் தலைவர் அவர்கள் தனது ஒப்புதலை அளித்துள்ளார்.”
மத்திய அரசின் இந்த அதிரடி நடவடிக்கை மற்றும் குடியரசுத் தலைவரின் ஒப்புதலைத் தொடர்ந்து, உச்ச நீதிமன்றத்தில் கூடுதலாக 4 புதிய நீதிபதிகள் நியமிக்கப்படவுள்ளனர். இதன் மூலம் தேங்கி கிடக்கும் வழக்குகளின் விசாரணை வேகம் எடுக்கும் என்பதால், நாட்டின் நீதித்துறை வட்டாரங்களில் இந்த அறிவிப்பு மிக முக்கிய மைல்கல்லாகப் பார்க்கப்படுகிறது.
