எரிபொருள் சிக்கன நடவடிக்கை: வாரத்தில் இரு நாட்கள் காணொலி காட்சி மூலம் வழக்கு விசாரணை – உச்ச நீதிமன்றம் அதிரடி அறிவிப்பு!
புதுடெல்லி:
மேற்கு ஆசியாவில் (மத்திய கிழக்கு நாடுகள்) நீடித்து வரும் போர்ச் சூழல் மற்றும் கச்சா எண்ணெய் விலையேற்றம் காரணமாக, எரிபொருளைச் சிக்கனமாகப் பயன்படுத்த வேண்டும் என்று பிரதமர் நரேந்திர மோடி நாட்டு மக்களுக்கு அண்மையில் கோரிக்கை விடுத்திருந்தார்.
பிரதமரின் இந்த வேண்டுகோளை ஏற்று, அதற்கு முழு ஆதரவு அளிக்கும் வகையில் உச்ச நீதிமன்றம் தனது அன்றாடச் செயல்பாடுகளில் அதிரடி மாற்றங்களைக் கொண்டு வந்து புதிய சுற்றறிக்கை ஒன்றை வெளியிட்டுள்ளது.
காணொலி வாயிலாக மட்டுமே விசாரணை:
அதன்படி, இனி வரும் வாரங்களில் திங்கள் மற்றும் வெள்ளிக்கிழமை ஆகிய இரண்டு நாட்களிலும் (Miscellaneous Days) அனைத்து வழக்கு விசாரணைகளும் முழுமையாகக் காணொலி காட்சி (Video Conferencing) வாயிலாக மட்டுமே நடைபெறும் என்று உச்ச நீதிமன்றம் அறிவித்துள்ளது. அதுமட்டுமின்றி, நீதிமன்றத்தின் பகுதி நேர வேலை நாட்களிலும் இதே ஆன்லைன் நடைமுறைதான் பின்பற்றப்படும். மறு உத்தரவு வரும் வரை இந்த புதிய விதிமுறை அமலில் இருக்கும் எனத் தெரிவிக்கப்பட்டுள்ளது.
நீதிபதிகள் மற்றும் ஊழியர்களுக்கான கட்டுப்பாடுகள்:
உச்ச நீதிமன்றச் செயலாளர் பாரத் பராஷர் வெளியிட்டுள்ள இந்த அறிவிப்பின்படி, எரிபொருள் பயன்பாட்டைக் குறைக்கும் நோக்கில் உச்ச நீதிமன்ற நீதிபதிகள் அனைவரும் தங்களுக்குள் ‘கார் பூலிங்’ (Car Pooling – வாகனப் பகிர்வு) முறையைப் பயன்படுத்த ஒருமனதாகச் சம்மதித்துள்ளனர். மேலும், நீதிமன்றப் பதிவாளர் அலுவலக (Registry) ஊழியர்களில் 50 சதவீதம் பேர் வாரத்தில் இரண்டு நாட்கள் வீட்டில் இருந்தபடியே வேலை செய்ய (Work From Home) அனுமதி அளிக்கப்பட்டுள்ளது.
தேவையற்ற பயணங்களையும், எரிபொருள் செலவுகளையும் குறைத்து, அரசு நிர்வாகத்தில் முன்மாதிரியாகத் திகழும் நோக்கில் உச்ச நீதிமன்றம் எடுத்துள்ள இந்த டிஜிட்டல் மற்றும் சிக்கன நடவடிக்கை ஒட்டுமொத்த நீதித்துறையிலும் பெரும் வரவேற்பைப் பெற்றுள்ளது.
