“தவெக-வுக்கு ஆதரவு என்ற பேச்சுக்கே இடமில்லை” – இபிஎஸ் ஆலோசனைக்குப் பிறகு கே.பி.முனுசாமி திட்டவட்டம்!
சென்னை: தமிழகத்தில் நிலவும் அரசியல் குழப்பங்களுக்கு இடையே, தமிழக வெற்றிக் கழகத்திற்கு (தவெக) அதிமுக ஆதரவு அளிக்கப்போவதாக வெளியான தகவல்களுக்கு அக்கட்சியின் துணைப் பொதுச்செயலாளர் கே.பி. முனுசாமி முற்றுப்புள்ளி வைத்துள்ளார்.
அதிமுக எம்.எல்.ஏ-க்கள் ஆலோசனை
சென்னை பசுமை வழிச்சாலையில் உள்ள எடப்பாடி பழனிசாமியின் இல்லத்தில், தேர்தலில் வெற்றி பெற்ற அதிமுக எம்.எல்.ஏ-க்களுடனான ஆலோசனைக் கூட்டம் இன்று நடைபெற்றது. இக்கூட்டத்தில் தவெக-வுக்கு ஆதரவு அளிப்பது குறித்து விவாதிக்கப்பட்டதாகவும், அது தொடர்பாக நிர்வாகிகளிடையே கருத்து முரண்பாடுகள் ஏற்பட்டதாகவும் தகவல்கள் பரவின.
முனுசாமியின் விளக்கம்
இந்த ஆலோசனைக் கூட்டத்திற்குப் பிறகு செய்தியாளர்களைச் சந்தித்த கே.பி. முனுசாமி கூறியதாவது:
“அதிமுக என்பது ஒரு மாபெரும் இயக்கம். பொதுச்செயலாளர் எடப்பாடி பழனிசாமி தலைமையில் கட்சி மிகச்சிறப்பாகச் செயல்பட்டு வருகிறது. தவெக-வுக்கு அதிமுக ஆதரவு அளிக்கப்போவதாக வெளிவரும் செய்திகள் முற்றிலும் தவறானவை. எந்தச் சூழலிலும், எந்த வகையிலும் தவெக-வுக்கு அதிமுக ஆதரவு அளிக்காது என்பதை எடப்பாடி பழனிசாமியின் ஒப்புதலோடு நான் திட்டவட்டமாகத் தெரிவித்துக் கொள்கிறேன்.”
ஏற்கனவே ஆட்சியமைக்கத் தேவையான பெரும்பான்மை கிடைக்காமல் தவெக திணறி வரும் நிலையில், பிரதான எதிர்க்கட்சியான அதிமுகவின் இந்தத் தெளிவான அறிவிப்பு விஜய்க்குப் பெரும் பின்னடைவாகக் கருதப்படுகிறது.
