“அமைச்சர் மனோ தங்கராஜ் தொகுதிக்கு எதையும் செய்யவில்லை” – பத்மநாபபுரத்தில் பாஜக வேட்பாளர் பா.ரமேஷ் அதிரடிப் பிரச்சாரம்!
கன்னியாகுமரி மாவட்டம் பத்மநாபபுரம் சட்டமன்றத் தொகுதியில் போட்டியிடும் பாரதிய ஜனதா கட்சி வேட்பாளர் பா.ரமேஷ், இன்று தொகுதிக்குட்பட்ட பல்வேறு பகுதிகளில் தீவிர வாக்கு சேகரிப்பில் ஈடுபட்டார்.
உற்சாக வரவேற்பும் ஆசியும்:
புலியூர்குறிச்சி, தக்கலை உள்ளிட்ட பகுதிகளில் அவர் பரப்புரை மேற்கொண்டபோது, வழிநெடுகிலும் பெண்கள் அவருக்கு ஆரத்தி எடுத்து உற்சாக வரவேற்பு அளித்தனர். இந்தப் பிரச்சாரத்தின் ஒரு பகுதியாக, மறைந்த முன்னாள் சட்டமன்ற உறுப்பினர் முகமது இஸ்மாயில் அவர்களின் இல்லத்திற்குச் சென்ற வேட்பாளர் ரமேஷ், அங்கு வைக்கப்பட்டுள்ள அவரது திருவுருவப் படத்திற்கு மாலை அணிவித்து மரியாதை செலுத்தினார். பின்னர், முகமது இஸ்மாயில் அவர்களின் மனைவியைச் சந்தித்து ஆசி பெற்றார்.
அமைச்சர் மீது விமர்சனம்:
இதனைத் தொடர்ந்து செய்தியாளர்களிடம் பேசிய பா.ரமேஷ், பத்மநாபபுரம் தொகுதியின் சட்டமன்ற உறுப்பினராகவும் அமைச்சராகவும் இருக்கும் மனோ தங்கராஜ், கடந்த காலங்களில் தொகுதி மக்களுக்குப் பயனுள்ள எந்த ஒரு திட்டத்தையும் செயல்படுத்தவில்லை என்றும், தொகுதி வளர்ச்சியைப் புறக்கணித்துவிட்டதாகவும் கடுமையாகக் குற்றம் சாட்டினார்.
“தொகுதி மக்களின் நீண்டகாலக் கோரிக்கைகளை நான் நன்கு அறிவேன். இந்த முறை வாய்ப்பளித்தால் மக்களின் அனைத்து அடிப்படைத் தேவைகளையும், கோரிக்கைகளையும் முன்னுரிமை அடிப்படையில் நிறைவேற்றுவேன்” என அவர் உறுதி அளித்தார்.
பாஜக வேட்பாளரின் இந்தத் தீவிரப் பிரச்சாரத்தால் பத்மநாபபுரம் தொகுதியில் தேர்தல் களம் சூடுபிடித்துள்ளது.
