பாலமேடு அருகே பரபரப்பு: கல்குவாரியை ரத்து செய்யக் கோரி சாலை மறியல் – தேர்தலைப் புறக்கணிக்கப் போவதாகப் பொதுமக்கள் எச்சரிக்கை!
பாலமேடு:
மதுரை மாவட்டம் பாலமேடு அருகே உள்ள சத்திர வெள்ளாளபட்டி ஊராட்சியில், கல்குவாரி செயல்பாடுகளுக்கு எதிர்ப்பு தெரிவித்துப் பொதுமக்கள் திடீர் சாலை மறியல் போராட்டத்தில் ஈடுபட்டதால் அப்பகுதியில் பெரும் பரபரப்பு ஏற்பட்டுள்ளது.
RelatedPosts
சத்திர வெள்ளாளபட்டி மலைப் பகுதியில் செயல்பட்டு வரும் தனியார் குவாரியில், விதிமுறைகளை மீறிச் சட்டவிரோதமாகவும், அதிநவீன வெடிபொருட்களைப் பயன்படுத்தியும் பாறைகள் தகர்க்கப்பட்டு வருவதாகப் பொதுமக்கள் நீண்டகாலமாகக் குற்றம்சாட்டி வருகின்றனர். இதனால் அப்பகுதி மக்களின் வாழ்வாதாரமும், சுற்றுப்புறச் சூழலும் பாதிக்கப்படுவதாகத் தெரிவித்து, இது குறித்துப் பலமுறை மாவட்ட அதிகாரிகளிடம் மனு அளித்தும் எந்தவிதமான நடவடிக்கையும் எடுக்கப்படவில்லை எனப் போராட்டக்காரர்கள் வேதனை தெரிவித்தனர்.
அதிகாரிகளின் மெத்தனப் போக்கினால் ஆத்திரமடைந்த நூற்றுக்கணக்கான பொதுமக்கள், இன்று சாலையில் அமர்ந்து மறியலில் ஈடுபட்டனர். குவாரிக்கான உரிமத்தை உடனடியாக ரத்து செய்யும் வரை தங்களது போராட்டம் தொடரும் என்று அறிவித்த அவர்கள், தமிழகச் சட்டமன்றத் தேர்தலுக்கு முன்பாக உரியத் தீர்வு காணப்படாவிட்டால், ஒட்டுமொத்தமாகத் தேர்தலைப் புறக்கணிக்கப் போவதாகவும் அதிரடியாக எச்சரிக்கை விடுத்துள்ளனர். தகவல் அறிந்து வந்த காவல்துறையினர் பொதுமக்களுடன் பேச்சுவார்த்தை நடத்தி வருகின்றனர்.
