தேசிய ஜனநாயகக் கூட்டணி தொகுதிப் பங்கீடு: சென்னை வந்த மத்திய அமைச்சர் பியூஷ் கோயலுக்குப் பா.ஜ.க. உற்சாக வரவேற்பு!
சென்னை:
தமிழகச் சட்டமன்றத் தேர்தலுக்கான அரசியல் களம் தீவிரமடைந்துள்ள சூழலில், தேசிய ஜனநாயகக் கூட்டணியின் தொகுதிப் பங்கீடு குறித்து முக்கியப் பேச்சுவார்த்தைகளை நடத்துவதற்காக மத்திய அமைச்சரும், தமிழக பா.ஜ.க. தேர்தல் பொறுப்பாளருமான பியூஷ் கோயல் இன்று சென்னை வந்தடைந்தார்.
சென்னை விமான நிலையம் வந்திறங்கிய அவருக்கு, பா.ஜ.க. மாநிலத் தலைவர் நயினார் நாகேந்திரன், முன்னாள் ஆளுநர் தமிழிசை சௌந்தரராஜன், முன்னாள் மத்திய அமைச்சர் பொன். ராதாகிருஷ்ணன் உள்ளிட்ட முக்கிய நிர்வாகிகள் மலர்க்கொத்து கொடுத்து உற்சாக வரவேற்பு அளித்தனர். மத்திய அமைச்சருடன் மற்றொரு மத்திய அமைச்சரான எல்.முருகனும் உடன் வந்திருந்தார்.
விமான நிலைய வரவேற்பைத் தொடர்ந்து, பியூஷ் கோயல் அங்கிருந்து நேரடியாகச் சென்னையில் உள்ள தனியார் நட்சத்திர விடுதிக்குச் சென்றார். அங்கு கூட்டணி கட்சிகளுடன் தொகுதிப் பங்கீடு மற்றும் தேர்தல் வியூகங்கள் குறித்து அவர் விரிவான ஆலோசனைகளை மேற்கொள்ள உள்ளார். இந்தப் பேச்சுவார்த்தைகளின் முடிவில், தேசிய ஜனநாயகக் கூட்டணியில் இடம்பெறும் கட்சிகள் மற்றும் அவற்றிற்கான தொகுதிகள் குறித்த முக்கிய அறிவிப்புகள் வெளியாகும் என எதிர்பார்க்கப்படுகிறது.
