புதுச்சேரி சட்டமன்றத் தேர்தல்: பாஜகவின் முதற்கட்ட வேட்பாளர் பட்டியல் வெளியீடு
புதுச்சேரி சட்டமன்றத் தேர்தலில் போட்டியிடும் பாரதிய ஜனதா கட்சியின் முதற்கட்ட வேட்பாளர் பட்டியலை அக்கட்சியின் மேலிடம் அதிகாரப்பூர்வமாக வெளியிட்டுள்ளது. ஏப்ரல் 9-ஆம் தேதி நடைபெறவுள்ள இந்தத் தேர்தலில், தேசிய ஜனநாயகக் கூட்டணியில் (NDA) இடம்பெற்றுள்ள பாஜக, புதுச்சேரியில் உள்ள முக்கியத் தொகுதிகளுக்கான தனது வேட்பாளர்களை அறிவித்துள்ளது.
இந்த அறிவிப்பின்படி, மண்ணடிப்பேட்டை தொகுதியில் ஏ. நமச்சிவாயம் போட்டியிடுகிறார். அதேபோல், ஊசுடு (தனி) தொகுதியில் இ. தீப்பைந்தன், காலாப்பேட்டை தொகுதியில் பி.எம்.எல். கல்யாணசுந்தரம், ராஜ் பவன் தொகுதியில் வி.பி. இராமலிங்கம் ஆகியோர் வேட்பாளர்களாக அறிவிக்கப்பட்டுள்ளனர். முதலியார்பேட்டை தொகுதியில் ஏ. ஜான்குமார், மணவெளி தொகுதியில் ஏம்பலம் ஆர்.செல்வம் ஆகியோர் களமிறங்குகின்றனர். காரைக்கால் பிராந்தியத்தில் திருநள்ளாறு தொகுதியில் ஜி.என்.எஸ். ராஜசேகரனும், நீரவி-டி.ஆர். பட்டினம் தொகுதியில் TKSM. மீனாட்சிசுந்தரமும் போட்டியிடுகின்றனர். மேலும், மாஹே தொகுதியில் ஏ. தினேசன் வேட்பாளராக நிறுத்தப்பட்டுள்ளார்.
தேசிய ஜனநாயகக் கூட்டணியில் அ.இ.ந.ரா.கா, பாஜக மற்றும் அதிமுக உள்ளிட்ட கட்சிகள் தொகுதிப் பங்கீட்டை நிறைவு செய்துள்ள நிலையில், பாஜகவின் இந்த வேட்பாளர் பட்டியல் அரசியல் வட்டாரத்தில் முக்கியத்துவம் வாய்ந்ததாகக் கருதப்படுகிறது.
