2026 சட்டமன்றத் தேர்தல் அறிக்கை வாகனம் தொடக்கம்
கும்பகோணம் அருகே, 2026 சட்டமன்றத் தேர்தலுக்கான அறிக்கை தயாரிப்பு வாகனத்தை தஞ்சாவூர் மாவட்ட பாஜக தலைவர் தங்க கென்னடி கொடியசைத்து அதிகாரப்பூர்வமாக தொடங்கி வைத்தார்.
மக்களின் தேவைகளையும் எதிர்பார்ப்புகளையும் நேரடியாக அறிந்து, அதனை அடிப்படையாகக் கொண்டு தேர்தல் அறிக்கையை உருவாக்க வேண்டும் என்ற நோக்கத்தில், தமிழக பாஜக இந்த முயற்சியை மேற்கொண்டுள்ளது.
இதன் ஒரு பகுதியாக, மாநிலம் முழுவதும் பாஜக நிர்வாகிகள் பொதுமக்களிடம் நேரில் கருத்துக்களை சேகரித்து, அவர்களின் கோரிக்கைகளை பதிவு செய்து வருகின்றனர்.
அந்த வரிசையில், கும்பகோணம் பேருந்து நிலையத்திலிருந்து 2026 சட்டமன்றத் தேர்தல் அறிக்கை வாகனம் புறப்பட்டது. பேருந்து நிலையத்திற்கு வந்த பொதுமக்கள், தங்கள் பகுதிகளில் வேண்டிய மாற்றங்கள் மற்றும் கோரிக்கைகளை விண்ணப்பங்களில் பதிவு செய்து, அதற்காக வைக்கப்பட்ட பெட்டிகளில் செலுத்தினர்.
இந்த நிகழ்ச்சியில் பாஜக மாவட்ட நிர்வாகிகள், கட்சி பொறுப்பாளர்கள் மற்றும் தொண்டர்கள் பெருந்திரளாக கலந்து கொண்டனர்.
