மலேசியா வந்தடைந்த பிரதமர் மோடிக்கு கோலாலம்பூரில் சிறப்பான வரவேற்பு
மலேசியா சென்ற பிரதமர் நரேந்திர மோடிக்கு, தலைநகர் கோலாலம்பூரில் மிகுந்த உற்சாகத்துடன் வரவேற்பு அளிக்கப்பட்டது.
இந்தியா–மலேசியா நாடுகளுக்கு இடையே 1957ஆம் ஆண்டிலிருந்து அதிகாரப்பூர்வ தூதரக உறவுகள் நிலவி வருகின்றன. ஆசிய நாடுகளுடன் இந்தியா மேற்கொண்டு வரும் “கிழக்கு நோக்கு” கொள்கையில் மலேசியா முக்கியமான கூட்டாளியாகக் கருதப்படுகிறது.
இந்த சூழலில், இரண்டு நாள் அரசு முறைச் சுற்றுப்பயணமாக பிரதமர் மோடி மலேசியாவை வந்தடைந்தார். கோலாலம்பூர் விமான நிலையத்தில் அவரை மலேசிய பிரதமர் அன்வர் இப்ராஹிம் நேரில் சந்தித்து அன்புடன் வரவேற்றார்.
விமான நிலையத்தில் பிரதமர் மோடிக்கு சிவப்பு கம்பள வரவேற்பு அளிக்கப்பட்டதுடன், பாரம்பரிய கலாச்சார நடன நிகழ்ச்சிகளும் ஏற்பாடு செய்யப்பட்டிருந்தன.
அதனைத் தொடர்ந்து, கோலாலம்பூரில் நடைபெறும் இந்திய வம்சாவளியினருக்கான சிறப்பு நிகழ்ச்சியில் பங்கேற்பதற்காக, மலேசிய பிரதமர் அன்வர் இப்ராஹிம் மற்றும் பிரதமர் மோடி இருவரும் ஒரே வாகனத்தில் இணைந்து சென்றனர்.
இதற்கிடையே, கோலாலம்பூரில் இந்திய வேருடைய மக்கள் பொம்மலாட்டம், பரதநாட்டியம், குச்சுப்புடி உள்ளிட்ட பல்வேறு இந்திய பாரம்பரிய நடனக் கலைகளை நிகழ்த்தி பிரதமர் மோடியை உற்சாகமாக வரவேற்றனர். இந்திய வம்சாவளியினர் வழங்கிய இந்த பாரம்பரிய கலை நிகழ்ச்சிகளை பிரதமர் மோடி ஆர்வத்துடன் ரசித்தார்.
