அமெரிக்காவை கலங்கடிக்கும் சீனாவின் ‘ஸ்டார்லிங்க் வேட்டையாளர்’ – சிறப்பு அலசல்
எலான் மஸ்க் உருவாக்கிய ஸ்டார்லிங்க் செயற்கைக்கோள் அமைப்பு தனது தேசிய பாதுகாப்புக்கு பெரும் ஆபத்தாக மாறும் என தொடர்ந்து எச்சரித்து வந்த சீனா, அதற்கு எதிரான சக்திவாய்ந்த ஆயுதத்தை உருவாக்கியுள்ளதாக தகவல்கள் வெளியாகியுள்ளன. இந்த புதிய ஆயுதம் குறித்த விரிவான செய்தித் தொகுப்பே இதுவாகும்.
உலகளவில் போர் நுட்பங்கள் வேகமாக மாற்றம் அடைந்து வருகின்றன. அணு ஆயுதப் போட்டியைத் தொடர்ந்து, இப்போது விண்வெளியை மையமாகக் கொண்ட ஆயுதப் போட்டியும் தீவிரமடைந்துள்ளது. இதன் ஒரு பகுதியாக, சீனாவும் அமெரிக்காவும் மேம்பட்ட நுண்ணலை (மைக்ரோவேவ்) ஆயுதங்களை உருவாக்கும் கடும் போட்டியில் ஈடுபட்டுள்ளன.
விண்வெளியில் சுழலும் செயற்கைக்கோள்களை நேரடியாக தாக்கி அழிப்பது மிகவும் சிக்கலானதும் ஆபத்தானதுமான நடவடிக்கையாக கருதப்படுகிறது. ஏவுகணைகள் மூலம் செயற்கைக்கோள்களை தாக்கும் போது, விண்வெளியில் பெருமளவு சிதறல்கள் உருவாகி, அதே நாட்டின் சொந்த செயற்கைக்கோள்களுக்கே ஆபத்தை ஏற்படுத்தும் சூழல் உருவாகும் என ஆய்வுகள் தெரிவிக்கின்றன.
இந்த அபாயங்களை தவிர்க்கவே, உயர் சக்தி கொண்ட மைக்ரோவேவ் ஆயுதங்கள் மீது அமெரிக்காவும் சீனாவும் கவனம் செலுத்தி வருகின்றன.
இதற்கிடையில், சீனா தனது ரகசிய உயர் ஆற்றல் நுண்ணலை ஆயுதத் திட்டத்தில் ஒரு முக்கிய கட்டத்தை எட்டியுள்ளதாக கூறப்படுகிறது. ‘ஹரிகேன்–3000’ என பெயரிடப்பட்டுள்ள இந்த ஆயுதம், அணு வெடிப்பின் தாக்கத்திற்கு இணையான வகையில் 80,000 வோல்ட் அளவிலான மின்காந்த துடிப்புகளை உருவாக்கும் திறன் கொண்டதாக தகவல்கள் தெரிவிக்கின்றன.
மேலும், ஸ்டார்லிங்க் செயற்கைக்கோள்களின் செயல்பாடுகளை முடக்குவதற்கான வழிமுறைகள் குறித்து சீனா கடந்த சில மாதங்களாக பல ஆய்வுக் கட்டுரைகளை வெளியிட்டு வருவதும் குறிப்பிடத்தக்கது.
சமீபத்தில், Northwest Institute of Nuclear Technology-யின் உயர் சக்தி மைக்ரோவேவ் அறிவியல் மற்றும் தொழில்நுட்ப ஆய்வகத்தைச் சேர்ந்த விஞ்ஞானி வாங் கேங் தலைமையிலான குழு, இந்த புதிய ஆயுதத்தை வெற்றிகரமாக உருவாக்கியுள்ளதாக தெரிவிக்கப்பட்டுள்ளது.
இந்த ஆயுதம் மின்சக்தியை சேமித்து வைத்து, டெஸ்லா காயில் போல ஒரே நேரத்தில் அதிவேக சக்தி துடிப்பாக வெளியிடும் தொழில்நுட்பத்தை பயன்படுத்துகிறது. இதனால் உருவாகும் மிகப்பெரிய மின்சக்தி உயர்வு, மைக்ரோவேவ் ஜெனரேட்டர்களை இயக்குவதோடு, எதிரியின் மின்னணு சாதனங்களை முற்றிலுமாக செயலிழக்கச் செய்யும் திறன் கொண்டது.
வடமேற்கு அணு தொழில்நுட்ப நிறுவனத்தைச் சேர்ந்த சீன விஞ்ஞானிகள், ‘மிடெல் 7131’ (Midel 7131) எனப்படும் சிறப்பு திரவ மின்காப்புப் பொருளைப் பயன்படுத்தி, அதிக ஆற்றல் சேமிப்பு திறன், வலுவான மின்தடை மற்றும் குறைந்த ஆற்றல் இழப்பு ஆகியவற்றை ஒருங்கிணைத்துள்ளனர். இதன் மூலம் சிறிய அளவில் மிகுந்த திறன் கொண்ட ஆயுதத்தை உருவாக்க முடிந்துள்ளதாக கூறப்படுகிறது.
1 ஜிகாவாட்டை (GW) மீறும் வெளியீட்டு திறன் கொண்ட, தரையில் இருந்து இயக்கப்படும் இந்த மைக்ரோவேவ் ஆயுதம், பூமியின் குறைந்த சுற்றுப்பாதையில் இயங்கும் ஸ்டார்லிங்க் செயற்கைக்கோள்களை செயலிழக்கச் செய்யும் திறன் பெற்றதாக தெரிவிக்கப்படுகிறது.
60 விநாடிகளில் செயல்படுத்தக்கூடிய உலகின் முதல் 20 ஜிகாவாட் மைக்ரோவேவ் ஆயுதம் இதுவே என சீன விஞ்ஞானிகள் கூறுகின்றனர். ‘TPG1000Cs’ என அழைக்கப்படும் இந்த கருவி, சீனாவின் மிக உயர்சக்தி கொண்ட நுண்ணலை ஆயுதமாக விளங்குகிறது.
இந்த தரை அடிப்படையிலான தொழில்நுட்பம் மூலம், பூமியின் குறைந்த சுற்றுப்பாதையில் இயங்கும் ஸ்டார்லிங்க் செயற்கைக்கோள்களின் செயல்பாடுகளை சீர்குலைப்பதோடு, அவற்றை முழுமையாக அழிக்கும் அளவிற்கும் இந்த ஆயுதம் பயன்படும் என தெரிவிக்கப்படுகிறது.
நான்கு மீட்டர் நீளமும், சுமார் ஐந்து டன் எடையும் கொண்ட இந்த ஆயுதத்தை லாரிகள், போர்க்கப்பல்கள், விமானங்கள் போன்றவற்றிலிருந்து இயக்க முடியும். மேலும், செயற்கைக்கோள்களில் பொருத்தக்கூடிய அளவிற்கு இது சிறிய வடிவத்தில் வடிவமைக்கப்பட்டுள்ளதாக கூறப்படுகிறது.
ரஷ்யாவின் 10 டன் எடை கொண்ட ‘Sinus–7’ மைக்ரோவேவ் ஆயுதத்தை விட, குறைந்த எடையில் அதிக சக்தி வெளிப்படுத்தும் வகையில் இந்த சீன ஆயுதம் உருவாக்கப்பட்டுள்ளது. ஒரு செயல்பாட்டு அமர்வில் மட்டும் 3,000 வரை உயர் சக்தி துடிப்புகளை வெளியிடும் திறன் இதற்கு இருப்பதாக தெரிவிக்கப்படுகிறது.
மேலும், கடந்த ஆண்டு பெய்ஜிங் தொழில்நுட்பக் கழகத்தின் (BIT) விஞ்ஞானிகள், தைவான் அளவிற்கு பரவியுள்ள ஸ்டார்லிங்க் செயற்கைக்கோள்களின் வலையமைப்பை சீர்குலைக்கும் ஆயுதக் கருத்தை கணினி உருவகப்படுத்தலின் மூலம் காட்டியிருந்தனர் என்பதும் குறிப்பிடத்தக்கது.
